तुकाराम मुंढे यांच्या घरी दरोडा पडल्याची चर्चा

प्रत्यक्षात नावाच्या साधर्म्यामुळे उडाला मोठा गोंधळ!

    दिनांक :18-Nov-2026
Total Views |

ठाणे,
tukaram-munde-diva-robbery-name-confusionमहाराष्ट्राच्या प्रशासकीय वर्तुळात आपल्या धडाकेबाज कार्यपद्धतीमुळे ओळखले जाणारे आयएएस अधिकारी तुकाराम मुंढे यांच्या नावाशी साधर्म्य असलेल्या एका व्यक्तीच्या घरी दरोडा पडल्याची घटना ठाणे जिल्ह्यातील दिवा परिसरात घडली. या घटनेची माहिती समोर येताच सोशल मीडियासह नागरिकांमध्ये मोठी चर्चा सुरू झाली. राज्याच्या अन्न व औषध प्रशासनाचे (एफडीए) आयुक्त असलेल्या तुकाराम मुंढे यांच्याच निवासस्थानी दरोडा पडल्याची चर्चा पसरल्याने प्रशासकीय वर्तुळातही संभ्रम निर्माण झाला. मात्र, पोलिसांच्या तपासातून या प्रकरणामागील वेगळेच वास्तव समोर आले. दरोडा आयएएस अधिकारी तुकाराम मुंढे यांच्या घरी नव्हे, तर त्यांच्याच नावाशी साधर्म्य असलेल्या दिव्यातील स्थानिक उद्योजक तुकाराम सत्यवान मुंडे यांच्या बंगल्यात पडल्याचे स्पष्ट झाले.
 

mundey 
ठाणे जिल्ह्यातील दिवा शहराजवळील आगासन गावात तुकाराम सत्यवान मुंडे हे स्थानिक उद्योजक राहतात. मंगळवारी, १७ नोव्हेंबर २०२६ रोजी पहाटेच्या सुमारास काही अज्ञात चोरट्यांनी त्यांच्या बंगल्याला लक्ष्य केले. घरात घुसलेल्या चोरट्यांनी सुमारे अडीच तोळे सोन्याचे दागिने आणि ८० हजार रुपयांची रोकड असा ऐवज चोरून नेला. चोरीची घटना उघडकीस आल्यानंतर आगासन परिसरात एकच खळबळ उडाली. घटनेची माहिती मिळताच पोलिसांनी घटनास्थळी धाव घेत तपास सुरू केला.
या घटनेत घरमालकाचे नाव तुकाराम मुंडे असल्याने सुरुवातीला मोठा गैरसमज निर्माण झाला. आयएएस अधिकारी तुकाराम मुंढे हे कठोर प्रशासकीय निर्णय आणि धडाकेबाज कारवाईसाठी परिचित आहेत. त्यामुळे दिव्यातील चोरीची बातमी समोर येताच ती थेट त्यांच्याशी जोडली गेली. सोशल मीडियावरही आयएएस अधिकारी तुकाराम मुंढे यांच्या घरातच दरोडा पडल्याच्या चर्चा सुरू झाल्या. प्रत्यक्षात मात्र या घटनेचा प्रशासकीय अधिकाऱ्याशी कोणताही संबंध नसल्याचे पोलिसांच्या तपासात निष्पन्न झाले.
दरम्यान, घटनेचे गांभीर्य लक्षात घेऊन मुंब्रा पोलिसांनी तातडीने घटनास्थळी पोहोचत पंचनामा केला. या प्रकरणी मुंब्रा पोलीस ठाण्यात गुन्हा दाखल करण्यात आला असून, चोरट्यांचा शोध घेण्यासाठी तपास सुरू करण्यात आला. पोलिसांनी केलेल्या प्राथमिक तपासातून दरोड्याचे ठिकाण हे स्थानिक उद्योजक तुकाराम सत्यवान मुंडे यांचे घर असल्याचे स्पष्ट झाले. केवळ नावातील साम्यामुळे आयएएस अधिकारी तुकाराम मुंढे यांच्याबाबत गैरसमज पसरल्याचेही समोर आले.
या प्रकरणात मुंब्रा पोलिसांनी तपासाला वेग दिला असून, एका संशयिताला ताब्यात घेतले आहे. त्याची सध्या कसून चौकशी सुरू आहे. या चोरीत आणखी कोणाचा सहभाग आहे, तसेच प्रत्यक्ष गुन्हेगार कोण आहेत, याचा शोध पोलीस घेत आहेत. नावाच्या साधर्म्यामुळे राज्यभर चर्चेत आलेल्या या घटनेचा तपास आता कोणत्या दिशेने जातो, याकडे लक्ष लागले आहे.