भाजपची महिला मतदारांसाठी विशेष रणनीती!

    दिनांक :19-Nov-2026
Total Views |
लखनौ,
bjps-special-strategy-for-women-voters उत्तर प्रदेशमध्ये २०२७ मध्ये होणाऱ्या विधानसभा निवडणुकीच्या पार्श्वभूमीवर भाजपने संघटनात्मक पातळीवर तयारीला वेग दिला आहे. महिला मतदारांपर्यंत पोहोचण्यासाठी पक्षाने विशेष रणनीती आखली असून राज्यातील सर्व ४०३ विधानसभा मतदारसंघांमध्ये महिला विस्तारक तैनात करण्याची योजना तयार केली आहे. या मोहिमेसाठी इतर राज्यांमधील महिला कार्यकर्त्यांचीही मदत घेतली जाणार आहे. भाजप महिला मोर्चाच्या नेतृत्वाखाली ही मोहीम राबविण्यात येणार आहे.
 
bjps-special
 
या अभियानांतर्गत महिला विस्तारक गावांपासून शहरांपर्यंत प्रत्यक्ष भेटी देऊन महिलांशी संवाद साधणार आहेत. केंद्र आणि राज्य सरकारच्या विविध योजनांची माहिती देण्यासोबतच महिला सुरक्षा, सन्मान आणि स्वावलंबनाशी संबंधित विषयांवरही चर्चा केली जाणार आहे. निवडणुकीपूर्वी प्रत्येक विधानसभा क्षेत्रातील महिलांशी थेट संपर्क प्रस्थापित करण्याचा पक्षाचा प्रयत्न आहे.
 
या रणनीतीला अंतिम स्वरूप देण्यासाठी शुक्रवारी लखनौमध्ये भाजपची विशेष कार्यशाळा आयोजित करण्यात आली आहे. या बैठकीला मुख्यमंत्री योगी आदित्यनाथ, प्रदेशाध्यक्ष पंकज चौधरी, राज्य प्रभारी विनोद तावडे आणि सहप्रभारी तथा खासदार मेधा कुलकर्णी उपस्थित राहणार आहेत. यावेळी महिला विस्तारकांची जबाबदारी, कामाची पद्धत आणि मतदारांपर्यंत पोहोचण्याच्या नियोजनावर चर्चा होण्याची शक्यता आहे.
 
पक्षाच्या संघटनात्मक विस्तार कार्यक्रमातही महिलांना अधिक संधी देण्याचे नियोजन आहे. नियुक्त केल्या जाणाऱ्या एकूण विस्तारकांपैकी जवळपास ५० टक्के महिला असण्याची शक्यता आहे. यामुळे संघटनेच्या तळागाळातील कामकाजात महिलांचा सहभाग वाढवण्यावर भाजपचा भर राहणार आहे.
 
सरकारी योजनांच्या माध्यमातून महिला मतदारांशी संपर्क साधण्याचीही तयारी करण्यात आली आहे. प्रधानमंत्री उज्ज्वला योजना, प्रधानमंत्री आवास योजना, शौचालय बांधकाम, मोफत शिधावाटप आणि आयुष्मान भारत यांसारख्या योजनांचा लाभ घेतलेल्या महिलांपर्यंत पक्षाचे कार्यकर्ते पोहोचणार आहेत. या योजनांचा महिलांना झालेला फायदा समजावून सांगण्याबरोबरच त्यांच्या अडचणी आणि अपेक्षाही जाणून घेतल्या जाणार आहेत.
 
दरम्यान, मथुरा येथे झालेल्या भाजपच्या संघटनात्मक बैठकीत मुख्यमंत्री योगी आदित्यनाथ आणि राष्ट्रीय अध्यक्ष नितीन नवीन यांनी आगामी विधानसभा निवडणुकीच्या तयारीचा आढावा घेतला होता. विकासकामे, कायदा व सुव्यवस्था, महिला सुरक्षा, सांस्कृतिक ओळख आणि राष्ट्रवाद या मुद्द्यांवर निवडणूक लढवण्याच्या दृष्टीने चर्चा झाली. श्रीकृष्ण जन्मभूमीचा मुद्दाही पक्षाच्या राजकीय आणि वैचारिक अजेंड्याचा महत्त्वाचा भाग असणार आहे.
 
याशिवाय पक्षातील कार्यकर्त्यांची नाराजी दूर करून त्यांना संघटनात्मक कामात सक्रिय करण्यावर भर देण्यात आला. बूथ स्तरावर तरुणांना जोडणे आणि 'राधे-राधे, कमल खिला दे' हा संदेश जनतेपर्यंत पोहोचवण्यासाठीही नियोजन करण्यात आले आहे. सरकारी योजनांचा लाभ संबंधित लाभार्थ्यांपर्यंत पोहोचतो की नाही, याची खात्री करण्याच्या सूचनाही मुख्यमंत्री योगी आदित्यनाथ यांनी दिल्या.
 
२०२७ मधील उत्तर प्रदेश विधानसभा निवडणुकीत भाजप आणि समाजवादी पक्ष यांच्यात प्रमुख राजकीय संघर्ष होण्याची शक्यता आहे. दुसरीकडे, समाजवादी पक्षाचा मित्रपक्ष असलेला काँग्रेसही राज्यात आपला जनाधार वाढवण्याच्या प्रयत्नात आहे. राज्यातील एकूण मतदारांमध्ये महिलांचे प्रमाण जवळपास निम्मे असल्याने भाजपने महिला मतदारांवर विशेष लक्ष केंद्रित केले आहे. सर्व मतदारसंघांत महिला विस्तारकांची नियुक्ती आणि संघटनेत महिलांना अधिक जबाबदाऱ्या देण्याची योजना ही त्याच निवडणूकपूर्व तयारीचा भाग मानली जात आहे.