हाजीपूर,
modis-development-gift-of-3-lakh-crore-to-bihar पंतप्रधान नरेंद्र मोदी उद्या बिहारमधील हाजीपूर येथे आयोजित भव्य कार्यक्रमाला उपस्थित राहणार आहेत. त्यांच्या दौऱ्याच्या पार्श्वभूमीवर प्रशासनाकडून जय्यत तयारी करण्यात आली आहे. या दौऱ्यात बिहारला तीन लाख कोटी रुपयांपेक्षा अधिक किमतीच्या २५०० हून अधिक विकास प्रकल्पांची भेट मिळणार आहे. याशिवाय गंगा नदीवरील नवनिर्मित नितीश सेतूचे उद्घाटनही पंतप्रधानांच्या हस्ते होणार आहे.
बिहारच्या वैशाली जिल्ह्यात गंगा नदीवर उभारण्यात आलेल्या या पुलाला माजी मुख्यमंत्री नितीश कुमार यांचे नाव देण्यात आले आहे. या पुलाच्या उभारणीसाठी पाच हजार ५०० कोटी रुपयांपेक्षा अधिक खर्च करण्यात आला आहे. त्यामुळे पंतप्रधानांच्या या दौऱ्याकडे राज्याच्या विकासाच्या दृष्टीने महत्त्वपूर्ण घडामोड म्हणून पाहिले जात आहे.
मोदींच्या स्वागतासाठी हाजीपूरमध्ये मोठ्या प्रमाणावर सजावट करण्यात आली आहे. कार्यक्रमासाठी पाच भव्य मंडप उभारण्यात आले असून, त्यामध्ये एक लाखांहून अधिक नागरिकांच्या बसण्याची व्यवस्था करण्यात आली आहे. मुख्य मंचासह संपूर्ण परिसरात एनडीएच्या नेत्यांचे आणि विविध पक्षांचे पोस्टर्स लावण्यात आले आहेत. पंतप्रधान कार्यक्रमस्थळी पोहोचण्याच्या सुमारे दोन तास आधी नितीश सेतूवरील वाहतूक बंद ठेवण्यात येणार आहे.
पंतप्रधानांच्या दौऱ्याच्या पार्श्वभूमीवर सुरक्षेचा कडेकोट बंदोबस्त ठेवण्यात आला आहे. हजारो पोलीस कर्मचाऱ्यांची तैनाती करण्यात आली असून, जिल्हा प्रशासनापासून राज्य पातळीवरील वरिष्ठ अधिकारी परिस्थितीवर लक्ष ठेवून आहेत. कार्यक्रम निर्विघ्न पार पडावा यासाठी सर्व यंत्रणा सज्ज करण्यात आल्या आहेत.
दरम्यान, बिहार भाजपचे प्रदेशाध्यक्ष संजय सरावगी यांनी पंतप्रधानांच्या दौऱ्याचे स्वागत करत विरोधकांवर निशाणा साधला. पंतप्रधान बिहारला मोठी विकासभेट देणार असून, तीन लाख कोटी रुपयांपेक्षा अधिक खर्चाच्या २५०० हून अधिक योजनांचे उद्घाटन आणि भूमिपूजन होणार असल्याचे त्यांनी सांगितले. नितीश कुमार यांच्या नावाने उभारण्यात आलेल्या पुलाच्या उद्घाटनाला विरोधक विरोध करत असल्याचा आरोपही त्यांनी केला.
लालूप्रसाद यादव आणि तेजस्वी यादव यांच्यावर टीका करताना सरावगी यांनी त्यांच्या कुटुंबाच्या १५ वर्षांच्या सत्ताकाळात विकासकामे झाली नसल्याचा आरोप केला. त्यांच्या कार्यकाळात एकही पूल किंवा छोटी मोरी बांधण्यात आली नसल्याचे ते म्हणाले. लालूप्रसाद यादव यांच्या कार्यकाळावर टीका करताना त्यांनी पशुसंवर्धन घोटाळ्याचाही उल्लेख केला. बिहारच्या जनतेने विकासकामांची दखल घेतली असून, त्यामुळेच आजच्या राजकीय परिस्थितीत फरक दिसत असल्याचा दावा त्यांनी केला.
या दौऱ्यापूर्वी आणखी एका राजकीय प्रश्नाची चर्चा रंगली आहे. बिहारचे माजी मुख्यमंत्री नितीश कुमार हे पंतप्रधान मोदींसोबत एकाच मंचावर उपस्थित राहणार का, याबाबत उत्सुकता निर्माण झाली आहे. भाजप प्रदेशाध्यक्ष संजय सरावगी यांना यासंदर्भात विचारणा करण्यात आली असता त्यांनी थेट उत्तर देणे टाळले. त्यांनी बिहार भाजपचे प्रभारी हरीश द्विवेदी यांच्याकडे प्रश्न वळवला. मात्र, द्विवेदी यांनीही यावर स्पष्ट भूमिका मांडली नाही.
यानंतर सरावगी यांनी एनडीएतील सर्व नेत्यांना कार्यक्रमाचे निमंत्रण देण्यात आले असून ते उपस्थित राहतील, असे सांगितले. मात्र, नितीश कुमार कार्यक्रमाला येणार का आणि ते पंतप्रधानांसोबत व्यासपीठावर दिसणार का, याबाबत स्पष्टता मिळालेली नाही. त्यामुळे विकासकामांच्या घोषणांसोबतच मोदींच्या हाजीपूर दौऱ्यातील राजकीय उपस्थितीबाबतही बिहारच्या राजकीय वर्तुळात चर्चा सुरू झाली आहे.