मुंबई
taylor swift अमेरिकन पॉपस्टार टेलर स्विफ्ट सध्या भारतीय मनोरंजनविश्वात चर्चेचा विषय ठरली आहे. दादासाहेब फाळके इंटरनॅशनल फिल्म फेस्टिव्हल अवॉर्ड्स २०२६ मध्ये तिला ‘इंटरनॅशनल आर्टिस्ट ऑफ द इयर’ या पुरस्काराने सन्मानित करण्यात येणार असल्याची घोषणा करण्यात आली आहे. शुक्रवारी आयोजकांनी सोशल मीडियाच्या माध्यमातून ही माहिती जाहीर केली. संगीतनिर्मिती, गीतलेखन आणि लाइव्ह परफॉर्मन्सच्या माध्यमातून जागतिक संगीतविश्वावर प्रभाव निर्माण करणाऱ्या टेलर स्विफ्टच्या योगदानाची दखल घेत हा पुरस्कार देण्यात येणार आहे. मात्र, या घोषणेपेक्षाही भारतीय चाहत्यांच्या प्रतिक्रियांनी सोशल मीडियावर अधिक लक्ष वेधून घेतले आहे.

टेलर स्विफ्टच्या नावाची पुरस्कारासाठी घोषणा झाल्यानंतर अनेक भारतीय चाहत्यांना सुरुवातीला आश्चर्याचा धक्का बसला. काही चाहत्यांनी तर ही बातमी खरी आहे की नाही, याची खात्री करण्यासाठी आयोजकांची अधिकृत घोषणा पुन्हा तपासल्याचे सोशल मीडियावर सांगितले. टेलरला भारतात पुरस्कार जाहीर झाल्याची बातमी अनेकांसाठी अनपेक्षित होती. त्यामुळे तिच्या चाहत्यांमध्ये या घोषणेची जोरदार चर्चा सुरू झाली आहे.
आयोजकांनी पुरस्काराची घोषणा करताना टेलर स्विफ्टच्या संगीत क्षेत्रातील कामगिरीचा विशेष उल्लेख केला. तिची संगीतनिर्मिती, स्वतः गाणी लिहिण्याची शैली आणि जगभरातील प्रेक्षकांसमोर सादर केले जाणारे लाइव्ह कार्यक्रम यांचा जागतिक संगीतविश्वावर मोठा प्रभाव पडला आहे. तिच्या या योगदानाचा गौरव करण्यासाठी ‘इंटरनॅशनल आर्टिस्ट ऑफ द इयर’ हा पुरस्कार जाहीर करण्यात आला आहे. यंदाच्या आंतरराष्ट्रीय पुरस्कारांच्या यादीत अभिनेता मायकेल बी. जॉर्डन, दिग्दर्शक पॉल थॉमस अँडरसन, अभिनेता जेसी आणि दिग्दर्शक जेम्स यांच्या नावांचाही समावेश असल्याचे सांगण्यात आले आहे.
दरम्यान, टेलर स्विफ्टला जाहीर झालेल्या या पुरस्काराबाबत एक महत्त्वाची बाब स्पष्ट होणे आवश्यक आहे. दादासाहेब फाळके इंटरनॅशनल फिल्म फेस्टिव्हल अवॉर्ड आणि भारत सरकारकडून दिला जाणारा दादासाहेब फाळके पुरस्कार हे दोन स्वतंत्र पुरस्कार आहेत. नावांमध्ये साम्य असले, तरी या दोन्ही पुरस्कारांचा एकमेकांशी संबंध नाही. त्यामुळे टेलर स्विफ्टला जाहीर झालेला सन्मान हा भारत सरकारच्या दादासाहेब फाळके पुरस्काराअंतर्गत नसून दादासाहेब फाळके इंटरनॅशनल फिल्म फेस्टिव्हल अवॉर्ड्सचा भाग आहे.
या घोषणेनंतर टेलर स्विफ्ट भारतात आली तर तिचा कार्यक्रम कसा असेल, याबाबतही चाहत्यांमध्ये उत्सुकता निर्माण झाली आहे. काही चाहत्यांनी तिने भारतात कार्यक्रम सादर करावा, अशी इच्छा व्यक्त केली आहे. तर काहींनी तिने बॉलिवूडमधील गाण्यांवरही परफॉर्म करावे, अशी मजेशीर कल्पना सोशल मीडियावर मांडली आहे.
मात्र, पुरस्कार स्वीकारण्यासाठी टेलर स्विफ्ट मुंबईत येणार आहे का, तसेच तिचा भारत दौरा आयोजित करण्यात येणार आहे का, याबाबत अद्याप कोणतीही अधिकृत माहिती समोर आलेली नाही. त्यामुळे तिच्या भारतीय चाहत्यांना तिच्या भारत भेटीसाठी आणखी प्रतीक्षा करावी लागणार आहे. पुरस्काराच्या घोषणेनंतर आता टेलर स्विफ्ट भारतात येणार का आणि हा सन्मान स्वीकारण्यासाठी ती उपस्थित राहणार का, याकडे सर्वांचे लक्ष लागले आहे.