वादळी वाऱ्यांसह पावसाची शक्यता, IMD अलर्ट जारी

    दिनांक :22-Nov-2026
Total Views |
मुंबई
heavy rainfall
देशातील हवामानात पुन्हा एकदा मोठा बदल होण्याची शक्यता असून, दक्षिण भारतासह अनेक भागांत पावसाचा जोर वाढण्याचा अंदाज भारतीय हवामान विभागाने वर्तवला आहे. पूर्वेकडून वाहणाऱ्या वाऱ्यांमुळे दक्षिण भारतात मुसळधार ते अतिमुसळधार पाऊस पडण्याची शक्यता आहे. याच पार्श्वभूमीवर हवामान विभागाने देशातील १५ राज्यांना पावसाचा इशारा दिला आहे. दुसरीकडे, उत्तर भारतात थंडीचा कडाका वाढण्याचा अंदाजही व्यक्त करण्यात आला आहे.


हवामान विभागाच्या अंदाजानुसार, पुढील २४ तासांत उत्तर प्रदेश, मध्य प्रदेश, छत्तीसगड, तमिळनाडू, पुद्दुचेरी, अरुणाचल प्रदेश, मेघालय, आसाम, नागालँड, मणिपूर, मिझोराम, त्रिपुरा, आंध्र प्रदेश, केरळ आणि कर्नाटक या १५ राज्यांमध्ये मुसळधार पाऊस पडू शकतो. काही भागांत पावसाचा जोर अधिक राहण्याची शक्यता असून, स्थानिक परिस्थितीनुसार जनजीवनावरही परिणाम होऊ शकतो.

काही ठिकाणी विजांचा कडकडाट आणि मेघगर्जनेसह पाऊस होण्याचा अंदाज आहे. याशिवाय, ताशी ६० किलोमीटर वेगाने वारे वाहण्याची शक्यता हवामान विभागाने व्यक्त केली आहे. या संभाव्य हवामान बदलाच्या पार्श्वभूमीवर नागरिकांनी सतर्क राहावे, असे आवाहन करण्यात आले आहे.

महाराष्ट्रातही काही तुरळक ठिकाणी पावसाची शक्यता वर्तवण्यात आली आहे. मात्र, राज्यातील इतर भागांमध्ये तापमानात घट होऊन थंडीचा गारठा वाढण्याचा अंदाज आहे. त्यामुळे राज्यात काही ठिकाणी पावसाचे वातावरण, तर अन्य भागांत थंडीचा प्रभाव जाणवू शकतो. दरम्यान, उत्तर भारतातील थंडी आणि दक्षिण व ईशान्य भारतातील पावसाची स्थिती यामुळे देशभरातील हवामानात वेगवेगळे बदल पाहायला मिळण्याची शक्यता आहे.