मार्लेश्वर मंदिराच्या गाभाऱ्यात दगड कोसळले

    दिनांक :22-Nov-2026
Total Views |
संगमेश्वर
marleshwar temple
संगमेश्वर तालुक्यातील प्रसिद्ध तीर्थक्षेत्र श्री क्षेत्र मार्लेश्वर येथील डोंगराच्या सुरक्षिततेचा प्रश्न दिवसेंदिवस गंभीर होत आहे. आठवडाभरापूर्वी डोंगरावरून कोसळलेल्या दगडांमुळे चार वर्षांच्या चिमुरडीचा मृत्यू झाल्याची घटना ताजी असतानाच आता थेट मार्लेश्वर मंदिराच्या गुहेतील गाभाऱ्यात छोटे दगड कोसळल्याचा प्रकार समोर आला आहे. विशेष म्हणजे, भारतीय तंत्रज्ञान संस्था (आयआयटी) मुंबईचे तज्ज्ञ मंदिर परिसराच्या सुरक्षिततेची पाहणी करत असतानाच ही घटना घडली. सुदैवाने त्या वेळी मंदिरात भाविकांची गर्दी नसल्याने कोणतीही जीवितहानी झाली नाही. मात्र, आठवडाभरातील या दोन घटनांमुळे भाविक आणि स्थानिकांच्या सुरक्षेचा प्रश्न ऐरणीवर आला आहे.



शुक्रवारी दुपारी सुमारे एक वाजण्याच्या सुमारास मार्लेश्वर मंदिराच्या गुहेतील गाभाऱ्यात अचानक छोटे दगड कोसळले. त्यावेळी आयआयटी मुंबईचे तज्ज्ञ मंदिराच्या सुरक्षिततेची तपासणी करत होते. घटनेचे गांभीर्य लक्षात घेऊन खबरदारीचा उपाय म्हणून काही काळ दर्शन थांबवण्यात आले. त्यानंतर तज्ज्ञांनी गाभाऱ्यात जाऊन पुन्हा पाहणी केली. परिस्थितीची खातरजमा केल्यानंतर भाविकांसाठी दर्शनसेवा पूर्ववत सुरू करण्यात आली.

दरम्यान, गेल्याच आठवड्यात मंदिराजवळील दत्त मंदिरासमोरील धबधब्याकडे जाणाऱ्या मार्गावर डोंगरावरून मोठे दगड कोसळले होते. या दुर्घटनेत ईश्वरपूर येथील चार वर्षीय रुत्वी संदीप पाटील हिचा मृत्यू झाला होता. तिचे वडील आणि चुलतेही या घटनेत जखमी झाले होते. या दुर्घटनेनंतर परिसरातील ग्रामस्थांमध्ये तीव्र संताप व्यक्त झाला. संबंधित ठेकेदारावर सदोष मनुष्यवधाचा गुन्हा दाखल करून कठोर कारवाई करावी, अशी मागणी ग्रामस्थांनी देवरुख पोलीस ठाण्याचे पोलीस निरीक्षक राजेंद्र यादव यांच्याकडे केली होती.

मार्लेश्वर परिसरात सुरू असलेल्या पुलाच्या बांधकामासाठी करण्यात येणाऱ्या सुरुंग स्फोटांमुळे डोंगरावरील दगड सैल होत असल्याचा आरोप ग्रामस्थांनी केला आहे. या स्फोटांमुळेच दगड कोसळण्याच्या घटना घडत असल्याचा त्यांचा दावा आहे. याबाबत वारंवार सूचना देऊनही आवश्यक सुरक्षा उपाययोजना करण्यात आल्या नसल्याचेही ग्रामस्थांचे म्हणणे आहे. यापूर्वी प्रशासनाला निवेदने देऊन संभाव्य धोक्याची कल्पना दिली होती. मात्र, वेळीच दखल घेतली असती, तर निष्पाप चिमुरडीचा जीव वाचला असता, अशी भावना ग्रामस्थांनी व्यक्त केली आहे.

आठवडाभरात घडलेल्या या दोन घटनांमुळे मार्लेश्वर परिसरातील सुरक्षिततेचा प्रश्न अधिकच गंभीर झाला आहे. एका दुर्घटनेत चिमुरडीला जीव गमवावा लागला, तर दुसऱ्या घटनेत थेट मंदिराच्या गाभाऱ्यात दगड कोसळले. त्यामुळे केवळ मंदिरातील दर्शनव्यवस्थाच नव्हे, तर संपूर्ण डोंगर परिसराची सुरक्षितता तपासण्याची आवश्यकता निर्माण झाली आहे.

पुलाच्या बांधकामासाठी होणारे सुरुंग स्फोट आणि डोंगरावरून दगड कोसळण्याच्या घटनांचा परस्पर संबंध आहे का, आयआयटी मुंबईच्या तज्ज्ञांच्या पाहणीतून नेमके काय निष्पन्न होणार, ग्रामस्थांनी केलेल्या आरोपांची प्रशासन चौकशी करणार का, असे प्रश्न उपस्थित होत आहेत. भाविक आणि स्थानिकांच्या सुरक्षेसाठी ठोस उपाययोजना कधी राबवण्यात येणार, हाही महत्त्वाचा मुद्दा आहे. जानेवारी २०२७ मध्ये होणाऱ्या यात्रेच्या पार्श्वभूमीवर प्रशासनाने या प्रश्नांची गांभीर्याने दखल घेऊन तातडीने प्रतिबंधात्मक उपाययोजना करणे आवश्यक आहे.