बुलंदशहर,
black-magic उत्तर प्रदेशातील बुलंदशहर येथे काळ्या जादूच्या संशयातून तीन वर्षांच्या चिमुकलीची हत्या झाल्याची धक्कादायक घटना समोर आली आहे. सकाळपासून बेपत्ता असलेल्या या मुलीचा मृतदेह रात्री उशिरा घरापासून अवघ्या ४० मीटर अंतरावरील एका भाड्याच्या खोलीत आढळून आला. या घटनेमुळे परिसरात मोठी खळबळ उडाली असून, संतप्त कुटुंबीयांनी दिल्ली रोडवर रास्ता रोको करत निषेध व्यक्त केला.
नगर कोतवाली पोलीस ठाण्याच्या हद्दीतील अवंती नगर भुड परिसरात ही घटना घडली. पोलिसांनी दिलेल्या माहितीनुसार, २१ नोव्हेंबर २०२६ रोजी तीन वर्षांची मुलगी सकाळी ११ वाजल्यापासून बेपत्ता होती. याबाबत तक्रार मिळताच पोलिसांनी परिसरात शोधमोहीम सुरू केली. रात्री उशिरा मुलीचा मृतदेह रोहताश राजपूत यांच्या घरात भाड्याने राहणाऱ्या सोनाली नावाच्या महिलेच्या खोलीत आढळून आला.
प्राथमिक तपासात मुलीची गळा दाबून हत्या करण्यात आल्याचा संशय व्यक्त केला जात आहे. तसेच घटनास्थळावरील परिस्थिती पाहता या प्रकरणाला तांत्रिक विधी आणि काळ्या जादूच्या संशयाची पार्श्वभूमी असण्याची शक्यता पोलिसांकडून तपासली जात आहे. मात्र, हत्येमागील नेमके कारण अद्याप स्पष्ट झालेले नाही. शवविच्छेदन अहवाल आणि पुढील तपासातूनच याबाबत खुलासा होणार आहे.
मुलीचा मृतदेह सापडल्याची माहिती मिळताच कुटुंबीयांनी संताप व्यक्त केला. त्यांनी दिल्ली रोडवर रास्ता रोको करून गोंधळ घातला. परिस्थितीचे गांभीर्य लक्षात घेऊन एसएसपी दिनेश कुमार सिंह यांच्यासह मोठा पोलीस ताफा घटनास्थळी दाखल झाला. एसएसपींनी घटनास्थळाची पाहणी करून तपासाबाबत माहिती घेतली.
दरम्यान, पोलिसांनी संशयित महिला सोनाली हिला ताब्यात घेतले असून तिची चौकशी सुरू आहे. पंचनामा केल्यानंतर चिमुकलीचा मृतदेह शवविच्छेदनासाठी पाठवण्यात आला आहे. हत्येचे कारण, काळ्या जादूचा संशय आणि या प्रकरणातील इतर संभाव्य बाबींचा पोलीस तपास करत आहेत. सध्या परिसरातील परिस्थिती नियंत्रणात असल्याची माहिती पोलिसांनी दिली आहे.