हार्दिकला टीम इंडियात ‘नो डायरेक्ट एंट्री’!

hardik-pandya भारतीय क्रिकेट संघाचा स्टार अष्टपैलू खेळाडू हार्दिक पांड्या सध्या दुखापतीमुळे संघाबाहेर आहे. मात्र, दुखापतीतून पूर्णपणे सावरल्यानंतरही त्याला भारतीय संघात लगेच स्थान मिळेल, याची खात्री नाही. भारतीय संघाचा कर्णधार शुभमन गिलने याबाबत महत्त्वाची माहिती दिली आहे. न्यूझीलंडविरुद्धच्या आगामी एकदिवसीय मालिकेपूर्वी माध्यमांशी संवाद साधताना त्याने हार्दिकच्या पुनरागमनाबाबत आपली भूमिका स्पष्ट केली.

 

 

शुभमन गिलने हार्दिक पांड्याचे कौतुक करताना त्याला संघातील महत्त्वाचा अष्टपैलू खेळाडू असल्याचे म्हटले. पुढील वर्षी होणाऱ्या आयसीसी एकदिवसीय विश्वचषकाच्या दृष्टीने हार्दिकची भूमिका महत्त्वपूर्ण ठरणार असल्याचेही त्याने संकेत दिले. हार्दिकशी आपले अनेकदा बोलणे झाले असून, त्याने काही काळ देशांतर्गत क्रिकेट खेळून भारतीय संघात पुनरागमन करावे, अशी अपेक्षा असल्याचे गिलने सांगितले. आगामी मालिकेत हार्दिकची उणीव नक्कीच जाणवेल, असेही त्याने स्पष्ट केले.

 

दरम्यान, दुखापतीतून सावरल्यानंतर हार्दिकला थेट भारतीय संघात संधी मिळण्याऐवजी आधी देशांतर्गत क्रिकेटमध्ये आपली तंदुरुस्ती सिद्ध करावी लागू शकते. आयएएनएसच्या वृत्तानुसार, पुनरागमनासाठी त्याला सय्यद मुश्ताक अली ट्रॉफी किंवा विजय हजारे ट्रॉफीमध्ये खेळण्याची संधी मिळू शकते. या स्पर्धांमधील कामगिरी आणि फिटनेसच्या आधारे त्याच्या पुनरागमनाचा मार्ग निश्चित होण्याची शक्यता आहे.

 

हार्दिक पांड्या कसोटी क्रिकेट खेळत नसला, तरी एकदिवसीय आणि टी-२० प्रकारात त्याचे संघातील योगदान महत्त्वाचे आहे. त्यामुळे त्याच्या अनुपस्थितीचा संघाच्या संतुलनावर परिणाम होतो. त्याने यावर्षी मार्चमध्ये न्यूझीलंडविरुद्ध शेवटचा आंतरराष्ट्रीय सामना खेळला होता. त्यानंतर तो आंतरराष्ट्रीय क्रिकेटपासून दूर आहे. मात्र, यादरम्यान तो आयपीएलमध्ये आपल्या संघाकडून खेळला आहे. त्याचा अखेरचा एकदिवसीय सामना मार्च २०२५ मध्ये झाला होता. आता हार्दिक पूर्णपणे तंदुरुस्त होऊन भारतीय संघात कधी परतणार, याकडे क्रिकेट चाहत्यांचे लक्ष लागले आहे.