हार्दिकच्या पुनरागमनाचा मार्ग खडतर!

path of return of Hardik भारतीय क्रिकेट संघाचा अष्टपैलू खेळाडू हार्दिक पांड्याच्या पुनरागमनाचा मार्ग सध्या कठीण दिसत आहे. २०२७ च्या एकदिवसीय विश्वचषकाच्या पार्श्वभूमीवर त्याच्या तंदुरुस्तीचा प्रश्न भारतीय संघासाठी महत्त्वाचा ठरला आहे. टीम इंडियात पुन्हा स्थान मिळवण्यासाठी हार्दिकला आधी देशांतर्गत क्रिकेटमध्ये आपली फिटनेस सिद्ध करावी लागेल, असे स्पष्ट संकेत कर्णधार शुभमन गिल याने दिले आहेत. आयपीएल २०२६ पासून हार्दिकने एकही व्यावसायिक क्रिकेट सामना खेळलेला नाही. भारत आणि न्यूझीलंड यांच्यात ४ नोव्हेंबरपासून सुरू होणाऱ्या एकदिवसीय मालिकेपूर्वी पत्रकार परिषदेत बोलताना गिलने हार्दिकच्या क्षमतेचे कौतुक केले. हार्दिक हा जागतिक दर्जाचा अष्टपैलू खेळाडू असून त्याच्यासारखी कौशल्ये असलेले क्रिकेटपटू दुर्मीळ आहेत. नवीन आणि जुना अशा दोन्ही चेंडूंनी गोलंदाजी करण्याची त्याची क्षमता संघासाठी उपयुक्त आहे. मात्र, दुखापतींमुळे त्याच्या उपलब्धतेवर मर्यादा येत असल्याचेही गिलने सांगितले.

 

 

 

हार्दिकच्या पुनरागमनाबाबत भूमिका स्पष्ट करताना गिल म्हणाला की, आयपीएलनंतर त्याने कोणताही सामना खेळलेला नाही. त्यामुळे भारतीय संघात परतण्यापूर्वी त्याला काही काळ देशांतर्गत क्रिकेटमध्ये खेळावे लागेल. भारतीय देशांतर्गत क्रिकेट हंगाम सुरू झाला असून हार्दिक लाल चेंडूचे क्रिकेट खेळत नसल्याने त्याच्यासाठी विजय हजारे ट्रॉफी आणि सय्यद मुश्ताक अली ट्रॉफी या स्पर्धा महत्त्वाच्या ठरू शकतात. लिस्ट-ए प्रकारातील विजय हजारे ट्रॉफीला १४ डिसेंबरपासून सुरुवात होणार आहे. या स्पर्धांमधील सहभागातून त्याला आपली तंदुरुस्ती आणि सामन्यासाठीची तयारी सिद्ध करण्याची संधी मिळू शकते. दरम्यान, हार्दिकच्या अनुपस्थितीत नितीश कुमार रेड्डी याने भारतीय संघातील वेगवान गोलंदाजी करणाऱ्या अष्टपैलू खेळाडूची भूमिका प्रभावीपणे सांभाळली आहे. तिन्ही क्रिकेट प्रकारांत संधी मिळत असताना त्याने फलंदाजी आणि गोलंदाजी या दोन्ही विभागांत चांगली कामगिरी केली आहे. त्यामुळे संघातील स्थान पुन्हा मिळवण्यासाठी हार्दिकसमोर आव्हान असणार आहे.

 

 

दरम्यान, दुखापतीतून पूर्णपणे सावरला नसल्यामुळे हार्दिकला ऑस्ट्रेलिया 'अ' संघाविरुद्धच्या एकदिवसीय मालिकेतूनही माघार घ्यावी लागली. या मालिकेसाठी त्याचा भारत 'अ' संघात समावेश करण्यात आला होता. मात्र, तंदुरुस्ती पूर्णपणे परत न मिळाल्याने त्याला संघातून वगळण्यात आले. आता न्यूझीलंडविरुद्धच्या एकदिवसीय मालिकेलाही तो मुकणार आहे. त्यामुळे २०२७ च्या विश्वचषकाच्या तयारीच्या दृष्टीने हार्दिकचे पुनरागमन कधी होणार आणि तो पुन्हा भारतीय संघात आपले स्थान कसे मिळवणार, याकडे क्रिकेट चाहत्यांचे लक्ष लागले आहे.