दीड एकर जमिनीसाठी सुनेच डोकं धडावेगळ केल!

Daughter-in-law murdered तेलंगणातील महबूबनगर जिल्ह्यात जमिनीच्या वादातून २८ वर्षीय महिलेची निर्घृण हत्या करण्यात आल्याची धक्कादायक घटना समोर आली आहे. सुनीता असे मृत महिलेचे नाव असून ती महबूबनगर मंडळातील ओबुलाय्यापल्ली गावची रहिवासी होती. सोमवारी दुपारी कोइलकोंडा मंडळातील चिंथल थांडा परिसरात शेताकडे जात असताना तिचे सासरे माणिक्य नाईक, दीर मान्या नाईक आणि पांडू नाईक तसेच पांडूची पत्नी पार्वती यांनी तिला अडविल्याचा आरोप आहे. त्यानंतर तिच्या गळ्याभोवती कापड बांधून तिला ओढत सासरी नेण्यात आले. तेथे चाकूने हल्ला करून तिची हत्या करण्यात आली. या हल्ल्यात तिचे शिर धडापासून वेगळे करण्यात आल्याचे पोलिसांनी सांगितले. घटनेची माहिती मिळताच पोलिसांनी घटनास्थळी धाव घेतली आणि मृतदेह शवविच्छेदनासाठी महबूबनगर सरकारी सामान्य रुग्णालयात पाठविला.

 

 

 

 

सुनीताच्या वडिलांनी दिलेल्या तक्रारीनंतर कोइलकोंडा पोलीस ठाण्यात भारतीय न्याय संहितेच्या कलम १०१ (हत्या) आणि १०३ (हत्येसाठी शिक्षा) अंतर्गत गुन्हा दाखल करण्यात आला आहे. पोलीस उपनिरीक्षक ए. नागराजू यांनी दिलेल्या माहितीनुसार, या प्रकरणातील चारही आरोपी फरार असून त्यांच्या शोधासाठी विशेष पथके तयार करण्यात आली आहेत. सुनीताच्या नावावर असलेल्या दीड एकर जमिनीच्या वादातून ही हत्या झाल्याचा पोलिसांना संशय आहे. सुनीताचा विवाह सुमारे १२ वर्षांपूर्वी चिंथल थांडा येथील बलराम याच्याशी झाला होता. या दाम्पत्याला दोन मुली आहेत. बलरामला मानसिक आरोग्याशी संबंधित समस्या असल्याने पती-पत्नीमध्ये वारंवार वाद होत असल्याचे सांगण्यात आले. सुमारे वर्षभरापूर्वी गावातील ज्येष्ठांनी मध्यस्थी करून हा वाद मिटवला होता. त्यावेळी सुनीता आणि तिच्या मुलींचे भविष्य सुरक्षित करण्यासाठी बलरामची दीड एकर जमीन सुनीताच्या नावावर करण्यात आली होती. मात्र, या निर्णयाला बलरामचे मोठे भाऊ पांडू नाईक आणि मान्या नाईक यांनी विरोध केला होता.

 

 

पोलिसांच्या माहितीनुसार, दोन्ही भावांनी बलराम आणि सुनीता यांना एकत्र राहण्यापासून रोखले होते. तसेच बलरामला वारंवार हैदराबादला घेऊन जात असल्याचेही समोर आले आहे. सासरच्या घरातील तणावामुळे सुनीता ओबुलाय्यापल्ली येथील माहेरी राहायला गेली होती. त्यानंतर तिच्या आई-वडिलांनी तिला पुन्हा चिंथल थांडा येथे जाण्यास समजावले आणि तिच्यासाठी घरही बांधून दिले. मागील महिनाभरापासून ती आपल्या दोन मुलींसह तेथे राहत होती. मात्र, सासरचे लोक तिच्यावर दीड एकर जमीन सोडून गावातून निघून जाण्यासाठी दबाव टाकत असल्याचा आरोप आहे. मालमत्ता सोडण्यास नकार दिल्यास जीवे मारण्याची धमकीही देण्यात आल्याचे पोलिसांच्या तपासात समोर आले आहे. याच जमिनीच्या वादातून सुनीताची हत्या झाल्याचा संशय व्यक्त केला जात असून पोलीस पुढील तपास करीत आहेत.