१८ वर्षीय पुतण्याचे अपघातात निधन अंतिम दर्शनावेळी पंजाबी कलाकार भावूक

divit aulakh पंजाबी संगीतविश्वातून एक अत्यंत दुःखद बातमी समोर आली आहे. प्रसिद्ध गायक यो यो हनी सिंग याच्या कुटुंबावर दुःखाचा डोंगर कोसळला असून, त्याचा १८ वर्षीय पुतण्या दिवित औलख याचे रस्ते अपघातात निधन झाले आहे. स्पीड रेकॉर्ड्सचे मालक दिनेश औलख यांचा दिवित हा मुलगा होता. रविवारी पहाटे जालंधर येथे झालेल्या भीषण अपघातात त्याचा मृत्यू झाला. अवघ्या १८व्या वर्षी दिवितने जगाचा निरोप घेतल्याने औलख कुटुंबाला मोठा धक्का बसला आहे. या घटनेमुळे संपूर्ण पंजाबी मनोरंजनसृष्टीत शोककळा पसरली आहे. मंगळवारी (३ नोव्हेंबर) दिवितवर अंत्यसंस्कार करण्यात आले. यावेळी पंजाबी संगीतविश्वातील अनेक प्रसिद्ध कलाकार उपस्थित होते. आपल्या लाडक्या व्यक्तीला अखेरचा निरोप देताना कुटुंबीयांसह उपस्थित कलाकारांनाही अश्रू अनावर झाले.

 

 

जालंधरमधील मॉडेल टाउन परिसरातील स्मशानभूमीत मंगळवारी दुपारी एक वाजता दिवितच्या पार्थिवावर अंत्यसंस्कार करण्यात आले. त्याला अखेरचा निरोप देण्यासाठी नातेवाईक, मित्रपरिवार आणि हितचिंतकांनी मोठी गर्दी केली होती. पंजाबी संगीतविश्वातील गिप्पी ग्रेवाल, बब्बू मान, जैजी बी, अमृत मान आणि सतिंदर सरताज यांनी दिवितच्या पार्थिवाला खांदा देत श्रद्धांजली अर्पण केली. प्रीत हरपाल आणि रणजीत बावा यांनीही उपस्थित राहून औलख कुटुंबाचे सांत्वन केले. या कठीण प्रसंगी संपूर्ण संगीतविश्व औलख कुटुंबाच्या पाठीशी उभे असल्याचे या उपस्थितीवरून दिसून आले.

यो यो हनी सिंगही आपल्या कुटुंबीयांसह अंत्यसंस्काराला उपस्थित होता. या दुःखद प्रसंगी तो आपले मेहुणे दिनेश औलख आणि कुटुंबातील अन्य सदस्यांना धीर देताना दिसला. दिवितच्या अचानक जाण्याने संपूर्ण कुटुंबावर दुःखाचा डोंगर कोसळला आहे.

या अंत्यसंस्कारातील सर्वाधिक हृदयद्रावक दृश्य दिवितच्या आईचे होते. सोशल मीडियावर समोर आलेल्या व्हिडीओमध्ये त्या मुलाच्या पार्थिवाजवळ उभ्या असल्याचे दिसत आहे. तरुण मुलाला गमावल्याचे दुःख त्यांच्या चेहऱ्यावर स्पष्टपणे जाणवत होते. त्या वारंवार मुलाला हाक मारत होत्या. स्वतःला सावरणेही त्यांच्यासाठी कठीण झाले होते. उपस्थित नातेवाईक आणि कुटुंबीय त्यांना आधार देण्याचा प्रयत्न करत होते. मात्र, पोटच्या मुलाला अशा प्रकारे निरोप देण्याची वेळ आल्याने त्यांचा आक्रोश पाहून उपस्थितांचेही डोळे पाणावले. दिवितचे वडील दिनेश औलख यांनी मुलावर अंत्यसंस्कार केले. या वेळी कुटुंबातील प्रत्येक सदस्य शोकाकुल होता. सोशल मीडियावर या प्रसंगाचे व्हिडीओ व्हायरल होत असून, नेटकऱ्यांकडून औलख कुटुंबीयांप्रति संवेदना व्यक्त केल्या जात आहेत.

दिवितचा अपघात रविवारी पहाटे साडेतीनच्या सुमारास जालंधर येथे झाला होता. या दुर्घटनेत त्याच्यासोबत असलेला त्याचा मित्र आरव तलवार याचाही मृत्यू झाला. दोघेही तरुण वयातच काळाच्या पडद्याआड गेल्याने त्यांच्या कुटुंबीयांसह मित्रपरिवाराला मोठा धक्का बसला आहे. दोघांच्याही आयुष्याची नुकतीच सुरुवात होत असताना या अपघाताने त्यांच्या स्वप्नांचा अंत झाला.

या अपघातासंदर्भात आणखी एक महत्त्वाची माहिती समोर आली आहे. अपघाताच्या वेळी दिवितच्या मोबाईलमध्ये क्रॅश डिटेक्शन हे फीचर सक्रिय होते. या सुविधेमुळे अपघाताची सूचना त्याच्या आईच्या मोबाईलवर पोहोचल्याचे सांगितले जात आहे. दिवितच्या फोनमध्ये आईचा क्रमांक आपत्कालीन संपर्क क्रमांक म्हणून नोंदवण्यात आला होता. अपघात झाल्यानंतर त्यांच्या मोबाईलवर दुर्घटनेचा अलर्ट आणि घटनास्थळाचे लोकेशनही प्राप्त झाले. त्यानंतर त्यांनी कुटुंबातील अन्य सदस्यांना याची माहिती दिली. कुटुंबीयांनी दिवितशी संपर्क साधण्याचा प्रयत्न केला; मात्र त्याच्याकडून कोणताही प्रतिसाद मिळाला नाही. त्यानंतर त्याच्या मित्रांशी संपर्क साधण्यात आला आणि अपघाताची माहिती समोर आली. दरम्यान, या दुर्घटनेमागील नेमके कारण अद्याप अधिकृतरीत्या स्पष्ट झालेले नाही.

 

दिवितला अखेरचा निरोप देण्यासाठी आलेले अभिनेते आणि विनोदवीर गुरप्रीत घुग्गी यांनीही या घटनेबद्दल तीव्र दुःख व्यक्त केले. यावेळी त्यांनी केवळ कुटुंबाचे सांत्वन केले नाही, तर देशातील वाढत्या रस्ते अपघातांबाबतही गंभीर प्रश्न उपस्थित केले. एखाद्या दुःखी कुटुंबाला भेटून सांत्वन करणे आणि नंतर आपापल्या घरी परतणे सोपे असते; मात्र ज्या कुटुंबाने आपला सदस्य गमावला आहे, त्यांना आयुष्यभर त्या दुःखाचा सामना करावा लागतो, असे ते म्हणाले. तरुण मुलाला अशा प्रकारे गमावणे ही अत्यंत दुर्दैवी घटना असल्याचेही त्यांनी नमूद केले.

रस्ते सुरक्षेच्या व्यवस्थेवर प्रश्नचिन्ह उपस्थित करताना घुग्गी यांनी, रस्त्यांवर अशा प्रकारे किती काळ लोकांचे रक्त सांडत राहणार, असा सवाल केला. अपघात रोखण्यासाठी केवळ चर्चा करून चालणार नाही, तर प्रत्यक्षात ठोस उपाययोजना करणे आवश्यक असल्याचे त्यांनी सांगितले. कमी वयातील वाहनचालकांना वाहतुकीच्या नियमांची जाणीव करून देणे, रस्त्यांची स्थिती सुधारणे, वाहनांवर रिफ्लेक्टर लावणे आणि वाहनांची नियमित देखभाल व सर्व्हिसिंग करणे यांसारख्या उपायांवर भर देण्याची गरज त्यांनी व्यक्त केली. रस्ते सुरक्षेबाबत आवश्यक तेवढी गांभीर्यपूर्ण यंत्रणा अद्याप दिसत नसल्याची खंतही त्यांनी व्यक्त केली. वेळीच जनजागृती आणि सुरक्षिततेच्या उपाययोजना केल्या नाहीत, तर भविष्यात आणखी अनेक कुटुंबांना अशाच दुःखाला सामोरे जावे लागेल, असा इशाराही त्यांनी दिला.

भाजप नेते सुशील रिंकू यांनीही दिवितच्या अंत्यसंस्काराला उपस्थित राहून औलख कुटुंबाचे सांत्वन केले. एवढ्या कमी वयात एखाद्या तरुणाचे अशा प्रकारे निधन होणे अत्यंत दुर्दैवी असल्याचे त्यांनी म्हटले. दिनेश औलख आणि त्यांच्या पत्नीला या दुःखातून सावरण्याचे बळ मिळावे, अशी प्रार्थना त्यांनी केली. काही दुःख अशी असतात, ज्यांचे वर्णन शब्दांत करता येत नाही. अशा संकटातून जाणाऱ्या कुटुंबाला ही वेदना सहन करण्याची शक्ती केवळ ईश्वरच देऊ शकतो, असे सांगत त्यांनी गुरुमहाराजांकडे औलख कुटुंबाला धैर्य देण्याची प्रार्थना केली.

दरम्यान, पुतण्याच्या निधनाने हनी सिंगही पूर्णपणे खचला आहे. अंत्यसंस्कारापूर्वी त्याने सोशल मीडियावर एक भावनिक पोस्ट शेअर करत आपल्या भावना व्यक्त केल्या होत्या. 'माझ्यासाठी हे दशक अंधकारमय आहे. माझ्या पुतण्याला गमावणे अत्यंत वेदनादायक आहे. भोलेनाथ, कृपा करा', अशा आशयाचे शब्द त्याने पोस्टमध्ये लिहिले होते. या पोस्टमधून दिवितच्या जाण्याने त्याला बसलेला धक्का स्पष्टपणे जाणवतो. तसेच भगवान भोलेनाथांकडे कुटुंबावर कृपा करण्याची प्रार्थनाही त्याने केली.

एका बाजूला तरुण मुलाला गमावल्याने औलख कुटुंब दुःखात बुडाले आहे, तर दुसरीकडे पंजाबी संगीतविश्वातील कलाकारही या घटनेने हळहळ व्यक्त करत आहेत. दिवितच्या अंत्यसंस्कारावेळी उमटलेला आक्रोश आणि कलाकारांची उपस्थिती यामुळे या घटनेचे गांभीर्य पुन्हा एकदा समोर आले आहे. या दुर्घटनेने रस्ते सुरक्षेचा प्रश्नही ऐरणीवर आणला असून, तरुणांचे जीव वाचवण्यासाठी ठोस उपाययोजनांची गरज अधोरेखित केली आहे.