तीन मजली इमारत कोसळली

मिळालेल्या माहितीनुसार, गुरुवारी सकाळी ९ वाजून ५० मिनिटांच्या सुमारास चावडी बाजार परिसरात इमारत कोसळल्याची माहिती अग्निशमन विभागाला मिळाली. त्यानंतर अग्निशमन दलाचे जवान आणि स्थानिक पोलीस तातडीने घटनास्थळी दाखल झाले. परिस्थितीची गंभीरता पाहता NDRF च्या पथकालाही मदतकार्यासाठी बोलावण्यात आले. ढिगाऱ्याखाली अडकलेल्या नागरिकांचा शोध घेण्यासाठी विविध पथके प्रयत्नशील आहेत.

प्राथमिक माहितीनुसार, संबंधित इमारतीत बांधकामाचे काम सुरू होते. याचदरम्यान गुरुवारी सकाळी अचानक संपूर्ण इमारत कोसळली. या दुर्घटनेनंतर इमारतीचा मोठ्या प्रमाणातील मलबा रस्त्यावर आणि आजूबाजूच्या परिसरात पसरला. चावडी बाजार मेट्रो स्थानकासमोर ही घटना घडल्याची प्राथमिक माहिती आहे. इमारत कोसळण्याचा मोठा आवाज ऐकून परिसरातील नागरिकांची धावपळ उडाली. काही क्षणांतच घटनास्थळी बघ्यांची गर्दी जमली.

एसओ डीके राय यांनी दिलेल्या माहितीनुसार, बांधकाम सुरू असलेली तीन मजली इमारत कोसळली असून, तिच्या आत काही नागरिक अडकले असण्याची शक्यता आहे. त्यामुळे बचाव पथकांकडून ढिगारा हटवून अडकलेल्या व्यक्तींचा शोध घेतला जात आहे. या दुर्घटनेत दोघांचा मृत्यू झाल्याची प्राथमिक माहिती आहे. मात्र, ढिगाऱ्याखाली आणखी किती जण अडकले आहेत, याचा निश्चित आकडा अद्याप समोर आलेला नाही.

दरम्यान, इमारत कोसळण्यामागील नेमके कारण अद्याप स्पष्ट झालेले नाही. बांधकाम सुरू असताना ही दुर्घटना नेमकी कोणत्या कारणामुळे घडली, याचा तपास संबंधित यंत्रणांकडून केला जाण्याची शक्यता आहे. सध्या बचावकार्याला प्राधान्य देण्यात येत असून, मदतकार्य पूर्ण झाल्यानंतरच दुर्घटनेतील एकूण जीवितहानी आणि नुकसानीचा तपशील स्पष्ट होणार आहे.