रोनाल्डोचा आंतरराष्ट्रीय फुटबॉलला अलविदा!

ronaldo-bids-farewell-to-international-football पोर्तुगालचा महान फुटबॉलपटू क्रिस्टियानो रोनाल्डो याने आंतरराष्ट्रीय फुटबॉलमधून निवृत्ती घेण्याचा निर्णय जाहीर केला आहे. सोशल मीडियाच्या माध्यमातून त्याने ही घोषणा केली असून, आता तो केवळ क्लब स्तरावरच खेळताना दिसणार आहे. या निर्णयामुळे त्याच्या तब्बल २३ वर्षांच्या आंतरराष्ट्रीय कारकिर्दीचा शेवट झाला आहे. पोर्तुगालच्या राष्ट्रीय संघाची प्रसिद्ध सात क्रमांकाची जर्सीही तो नोव्हेंबरमधील आंतरराष्ट्रीय सामन्यांच्या विश्रांतीनंतर परत करणार असल्याचे त्याने स्पष्ट केले आहे.

 

 

वयाच्या अवघ्या १८ व्या वर्षी रोनाल्डोने २० ऑगस्ट २००३ रोजी कझाकस्तानविरुद्धच्या सामन्यातून पोर्तुगालकडून आंतरराष्ट्रीय फुटबॉलमध्ये पदार्पण केले होते. त्यानंतरच्या प्रवासात त्याने अनेक विक्रम आपल्या नावावर केले. पोर्तुगालकडून खेळताना त्याने एकूण २३४ सामने खेळले असून, १४६ गोल आणि ४६ असिस्ट्सची नोंद केली आहे. आपल्या संपूर्ण कारकिर्दीत त्याने आतापर्यंत ९८५ गोल केले आहेत. आता क्लब फुटबॉलमध्ये खेळताना एक हजार गोलांचा ऐतिहासिक टप्पा गाठण्याचे त्याचे लक्ष्य आहे.

 

रोनाल्डोच्या नावावर विश्वचषकातीलही अनेक विक्रम आहेत. २००६ मध्ये जर्मनी येथे झालेल्या विश्वचषकातून त्याने या स्पर्धेत पदार्पण केले. त्यानंतर २०१०, २०१४, २०१८, २०२२ आणि २०२६ अशा सलग सहा विश्वचषक स्पर्धांमध्ये त्याने पोर्तुगालचे प्रतिनिधित्व केले. सहा वेगवेगळ्या विश्वचषक स्पर्धांमध्ये गोल करणारा तो जगातील एकमेव फुटबॉलपटू ठरला आहे.

 

विश्वचषकाच्या इतिहासात रोनाल्डोने एकूण २७ सामने खेळताना ११ गोल केले आहेत. २०२६ च्या विश्वचषकात उझबेकिस्तानविरुद्ध केलेल्या गोलचाही त्यात समावेश आहे. मात्र, एवढी मोठी कारकीर्द गाजवूनही त्याला विश्वचषकाची ट्रॉफी उंचावता आली नाही. पोर्तुगालने २००६ मध्ये उपांत्य फेरीपर्यंत मजल मारली होती. हीच विश्वचषकातील संघाची सर्वोत्तम कामगिरी ठरली असून, त्या स्पर्धेत पोर्तुगालला चौथ्या स्थानावर समाधान मानावे लागले होते.