राज्यात १,४४० वैद्यकीय अधिकाऱ्यांच्या नियुक्त्या!

Abitkar unhappy with hospital administration राज्यातील सार्वजनिक आरोग्य व्यवस्थेतील त्रुटी आणि कामकाजातील हलगर्जीपणाची दखल घेत आरोग्यमंत्री प्रकाश आबिटकर यांनी कारवाईचा बडगा उगारला आहे. आरोग्य संवाद यात्रेच्या पहिल्याच दिवशी नांदेड जिल्ह्यातील आरोग्य यंत्रणेचा आढावा घेताना त्यांनी अकार्यक्षम आणि बेजबाबदार अधिकारी व कर्मचाऱ्यांविरोधात कठोर भूमिका घेतली. लोहा, मुखेड, हिमायतनगर आणि सोनखेड या तालुक्यांतील विविध दवाखाने आणि रुग्णालयांना भेटी दिल्यानंतर आरोग्यसेवा पुरवण्यात त्रुटी आढळलेल्या ११ जणांवर तातडीने कारवाई करण्याचे आदेश त्यांनी दिले. यामध्ये सहा डॉक्टर, दोन आयडीडब्ल्यू इंजिनिअर, राष्ट्रीय आरोग्य अभियानातील दोन डीपीएम अधिकारी आणि दोन तालुका आरोग्य अधिकारी यांचा समावेश असल्याचे वृत्तात नमूद करण्यात आले आहे.

 

 

 

 

या दौऱ्यात आरोग्य व्यवस्थेतील कामकाजाची तपासणी करताना आणखी १० जणांच्या चौकशीचे आदेश देण्यात आले आहेत. चौकशीत दोषी आढळणाऱ्यांवर तातडीने निलंबनाची कारवाई करण्याच्या सूचनाही मंत्र्यांनी दिल्या आहेत. याशिवाय चार जणांच्या तात्काळ बदलीचे निर्देश देण्यात आले आहेत. या कारवाईमुळे आरोग्य विभागातील अधिकारी आणि कर्मचाऱ्यांमध्ये खळबळ उडाली आहे. आरोग्य संवाद यात्रेच्या माध्यमातून विविध जिल्ह्यांतील सरकारी रुग्णालये आणि आरोग्य केंद्रांच्या कामकाजाची पाहणी केली जात असल्याने आगामी दौऱ्यांच्या पार्श्वभूमीवर संबंधित यंत्रणांकडून तयारी सुरू असल्याची माहिती सूत्रांनी दिली आहे.

 

 

 

दरम्यान, राज्यातील सार्वजनिक आरोग्य सेवा अधिक सक्षम करण्यासाठी वैद्यकीय अधिकारी भरतीवरही शासनाने भर दिला आहे. ग्रामीण, दुर्गम आणि आदिवासी भागांतील नागरिकांना वेळेत दर्जेदार उपचार मिळावेत, यासाठी महाराष्ट्र वैद्यकीय व आरोग्य सेवा गट-अ (एस-२०) संवर्गातील एकूण १ हजार ४४० वैद्यकीय अधिकाऱ्यांना नियुक्ती आदेश देण्याचा कार्यक्रम आयोजित करण्यात आला होता. यामध्ये ६७४ विशेषज्ञ वैद्यकीय अधिकारी आणि ७६६ एमबीबीएस वैद्यकीय अधिकाऱ्यांचा समावेश आहे. या नियुक्त्यांमुळे सरकारी रुग्णालयांमधील डॉक्टरांची कमतरता भरून काढण्यास मदत होणार असून, राज्यातील आरोग्यसेवा अधिक गुणवत्तापूर्ण आणि लोकाभिमुख करण्याच्या प्रयत्नांना बळ मिळण्याची अपेक्षा आहे.