विश्वचषकासाठी ब्रुकचा मास्टरप्लॅन!

brooks-masterplan-for-the-world-cup पुढील वर्षी होणाऱ्या २०२७ च्या एकदिवसीय विश्वचषकाची तयारी आतापासूनच सुरू झाली असून, इंग्लंडचा कर्णधार हॅरी ब्रुक याने संघासाठी मोठे लक्ष्य निश्चित केले आहे. इंग्लंडला जगातील सर्वाधिक तंदुरुस्त आणि बलाढ्य संघांपैकी एक बनवण्याचा निर्धार त्याने व्यक्त केला आहे. मैदानावरील विजयाबरोबरच खेळाडूंची शारीरिक क्षमता, फिटनेस आणि सराव यावर विशेष भर देण्याची रणनीती ब्रुकने आखली आहे.

इंग्लंडचा संघ सध्या टी-२० आणि एकदिवसीय मालिकांसाठी ऑस्ट्रेलिया दौऱ्यावर आहे. १३ नोव्हेंबरपासून एकदिवसीय मालिकेला सुरुवात होणार आहे. या मालिकेपूर्वी ब्रुकने संघाच्या तयारीबाबत आपली भूमिका स्पष्ट केली. मागील वर्षी ॲशेस मालिकेसाठी ऑस्ट्रेलिया दौऱ्यावर असताना इंग्लंडच्या संघाला प्रसारमाध्यमे आणि वृत्तपत्रांच्या टीकेचा सामना करावा लागला होता. मात्र, यावेळी परिस्थिती वेगळी असून संघ शांत वातावरणात तयारी करत असल्याचे ब्रुकने सांगितले.

नव्या कर्णधाराच्या नेतृत्वाखाली इंग्लंडच्या एकदिवसीय संघात नव्या उत्साहाची अपेक्षा होती. मात्र, पाकिस्तानमधील त्रिकोणी मालिकेत संघाला अपेक्षित कामगिरी करता आली नाही. पाकिस्तान आणि श्रीलंकेविरुद्ध खेळलेल्या चार सामन्यांपैकी इंग्लंडला केवळ एका सामन्यात विजय मिळवता आला. या मालिकेत हॅरी ब्रुकने द्विशतक झळकावले होते. मात्र, त्याची वैयक्तिक कामगिरी संघाला सातत्यपूर्ण यश मिळवून देऊ शकली नाही.

मागील चुका सुधारण्याच्या उद्देशाने इंग्लंडने ऑस्ट्रेलियातील सरावावर विशेष लक्ष केंद्रित केले आहे. शनिवारी पर्थमधील नूतनीकरण करण्यात आलेल्या वाका मैदानावर वेस्टर्न ऑस्ट्रेलियाविरुद्ध सराव सामना खेळण्याचे नियोजन आहे. या मैदानावरील खेळपट्टीवर ऑप्टस स्टेडियमप्रमाणेच वेग आणि उसळी मिळत असल्याने आगामी मालिकेच्या तयारीसाठी त्याचा फायदा होईल, असा विश्वास ब्रुकने व्यक्त केला.

इंग्लंडला विश्वचषकात प्रभावी कामगिरी करायची असेल, तर खेळाडूंची तयारी सर्वोत्तम असणे आवश्यक आहे, असे ब्रुकचे मत आहे. सामन्याचा निकाल आपल्या हातात नसतो; मात्र मैदानाबाहेरची मेहनत, सराव आणि तंदुरुस्ती या गोष्टी पूर्णपणे खेळाडूंच्या नियंत्रणात असतात. त्यामुळे संघाला अधिक सक्षम बनवण्यासाठी फिटनेस आणि प्रशिक्षणावर भर दिला जात असल्याचे त्याने स्पष्ट केले.

दरम्यान, इंग्लंडच्या संघात गोलंदाजांच्या निवडीवरूनही चर्चा सुरू आहे. गेल्या दहा वर्षांपासून संघाचा प्रमुख फिरकी गोलंदाज आणि सर्वाधिक बळी घेणारा आदिल रशीद याला पाकिस्तानविरुद्धच्या तीन सामन्यांमध्ये खेळण्याची संधी देण्यात आली नव्हती. त्याऐवजी कर्णधार हॅरी ब्रुकने डावखुरा फिरकीपटू लियाम डॉसनला पसंती दिली. या निवडीमुळे आगामी सामन्यांसाठी फिरकी गोलंदाजांच्या स्थानाबाबत उत्सुकता निर्माण झाली आहे. २०२७ च्या विश्वचषकापूर्वी संघातील त्रुटी दूर करून खेळाडूंना शारीरिक आणि मानसिकदृष्ट्या सक्षम बनवण्याचे इंग्लंडचे लक्ष्य आहे. त्यामुळे ऑस्ट्रेलियाविरुद्धची आगामी एकदिवसीय मालिका इंग्लंडच्या विश्वचषक तयारीच्या दृष्टीने महत्त्वाची ठरणार आहे.