विश्वचषकाच्या तयारीसाठी न्यूझीलंड दौरा महत्त्वाचा; गिलचा विश्वास

new-zealand-tour आगामी एकदिवसीय विश्वचषकाच्या दृष्टीने न्यूझीलंडचा सध्याचा दौरा भारतीय संघासाठी अत्यंत उपयुक्त ठरणार असल्याचा विश्वास कर्णधार शुभमन गिलने व्यक्त केला आहे. न्यूझीलंडमधील वातावरण आणि खेळपट्ट्यांचे स्वरूप विश्वचषकात असणाऱ्या परिस्थितीशी मिळतेजुळते असल्याने भारतीय खेळाडूंना स्पर्धेपूर्वीच त्याचा अनुभव घेता येईल, असे गिलने म्हटले आहे.

 

 

न्यूझीलंडविरुद्धच्या दुसऱ्या एकदिवसीय सामन्याआधी बोलताना गिलने या मालिकेचे महत्त्व अधोरेखित केले. भारतीय संघाचा न्यूझीलंड दौरा सहसा डिसेंबर-जानेवारीदरम्यान होत असतो. मात्र, यावेळी नोव्हेंबरमध्येच खेळण्याची संधी मिळाल्याने आगामी विश्वचषकाच्या तयारीला त्याचा फायदा होईल, असे त्याने स्पष्ट केले. बीसीसीआयने सोशल मीडियावर शेअर केलेल्या व्हिडिओमध्ये गिलने आपली भूमिका मांडली आहे.

 

दरम्यान, भारताने ऑकलंड येथे झालेल्या पाच सामन्यांच्या एकदिवसीय मालिकेतील पहिल्या सामन्यात न्यूझीलंडवर विजय मिळवत १-० अशी आघाडी घेतली. पावसामुळे सामन्यात व्यत्यय आला होता. मात्र, डकवर्थ-लुईस-स्टर्न (डीएलएस) नियमानुसार मिळालेले १४३ धावांचे लक्ष्य भारतीय संघाने सहज पूर्ण केले. मालिकेतील दुसरा सामना शनिवारी वेलिंग्टन येथे होणार असून, या सामन्यावरही पावसाचे सावट असल्याचे सांगितले जात आहे.

 

शुभमन गिल इतर सहकाऱ्यांच्या आधी न्यूझीलंडमध्ये दाखल होण्यामागचे कारणही समोर आले आहे. फलंदाजीचा अधिक सराव करता यावा, यासाठी त्याने लवकर पोहोचण्याचा निर्णय घेतला होता. विशेषतः लाल चेंडूने सराव करण्यावर त्याने भर दिला. न्यूझीलंडमध्ये कसोटी सामने खेळण्याचा अनुभव मर्यादित असल्याने तेथील खेळपट्ट्यांवर लाल चेंडूची हालचाल समजून घेणे त्याच्यासाठी महत्त्वाचे होते. संघात दाखल होण्यापूर्वी चार ते पाच अतिरिक्त सराव सत्रे करण्याचे त्याचे नियोजन होते. एकदिवसीय मालिकेनंतर भारत आणि न्यूझीलंड यांच्यात दोन सामन्यांची कसोटी मालिका खेळवली जाणार आहे. त्यामुळे एकदिवसीय विश्वचषकाच्या तयारीसोबतच गिलला कसोटी क्रिकेटसाठीही सरावाची संधी मिळणार आहे.