पवन कल्याणच्या भाच्याचा थाटात साखरपुडा!

pawan-kalyan तेलुगू चित्रपटसृष्टीतील मेगा कुटुंबात सध्या आनंदाचे वातावरण आहे. अभिनेता साई दुर्गा तेज लवकरच विवाहबंधनात अडकणार असून, गुरुवारी (५ नोव्हेंबर २०२६) त्याचा किरणमयीसोबत हैदराबाद येथे साखरपुडा पार पडल्याची माहिती समोर आली आहे. कुटुंबीय आणि जवळच्या नातेवाइकांच्या उपस्थितीत हा सोहळा खासगी स्वरूपात आयोजित करण्यात आला होता. या वृत्तानंतर चाहत्यांकडून साई दुर्गा तेज आणि किरणमयी यांच्यावर शुभेच्छांचा वर्षाव होत आहे. मात्र, या सोहळ्याबाबत अभिनेता किंवा त्याच्या कुटुंबीयांकडून अद्याप अधिकृत घोषणा करण्यात आलेली नाही.

 

 

साई दुर्गा तेजचा चुलत भाऊ आणि अभिनेता राम चरण याने सोशल मीडियावर एक खास फोटो शेअर करत या जोडीचे अभिनंदन केले. नव्या आयुष्याच्या सुरुवातीसाठी दोघांना शुभेच्छा देताना त्याने त्यांच्या आयुष्यात प्रेम, आनंद आणि एकमेकांची कायम साथ लाभावी, अशी भावना व्यक्त केली. राम चरणच्या या पोस्टमुळे साखरपुड्याच्या वृत्ताला अधिक चर्चा मिळाली आहे.

 

या खास सोहळ्याला मेगा कुटुंबातील अनेक सदस्य उपस्थित असल्याचे सांगितले जात आहे. यामध्ये राम चरणसोबतच अल्लू अर्जुन, वरुण तेज, अल्लू सिरीश, वैष्णव तेज, निहारिका कोनिडेला आणि पवन कल्याणचा मुलगा अकिरा नंदन यांचाही समावेश असल्याची माहिती आहे. मात्र, कार्यक्रमाचे सविस्तर फोटो आणि इतर तपशील अद्याप समोर आलेले नाहीत.

 

साखरपुड्यानंतर आता साई दुर्गा तेजच्या लग्नाचीही चर्चा सुरू झाली आहे. काही माध्यमांच्या वृत्तानुसार, तो १० डिसेंबर २०२६ रोजी किरणमयीसोबत विवाहबंधनात अडकण्याची शक्यता आहे. मात्र, लग्नाच्या तारखेबाबत कुटुंबीयांकडून कोणतीही अधिकृत माहिती देण्यात आलेली नाही.

 

दरम्यान, किरणमयी हिच्याबद्दल फारशी माहिती सार्वजनिक झालेली नाही. काही तेलुगू माध्यमांच्या वृत्तानुसार, साई दुर्गा तेज आणि किरणमयी हे एकमेकांना बऱ्याच काळापासून ओळखतात. काही वृत्तांमध्ये ती अभिनेत्याची बालपणीची मैत्रीण असल्याचाही उल्लेख करण्यात आला आहे. मात्र, तिचे शिक्षण, कुटुंब आणि व्यवसाय याबाबतची माहिती अद्याप समोर आलेली नाही.

 

साई दुर्गा तेज हा तेलुगू चित्रपटसृष्टीतील प्रसिद्ध कोनिडेला आणि अल्लू कुटुंबाचा सदस्य आहे. तो मेगास्टार चिरंजीवी, पवन कल्याण आणि नागा बाबू यांचा भाचा असून, राम चरण, अल्लू अर्जुन आणि वरुण तेज यांचा चुलत भाऊ आहे. २०१४ मध्ये 'पिल्ला नुव्वू लेनी जीवितम' या चित्रपटातून त्याने अभिनय क्षेत्रात पदार्पण केले. त्यानंतर 'सुप्रीम', 'चित्रलहरी', 'प्रति रोजू पांडागे', 'रिपब्लिक' आणि 'विरुपाक्ष' यांसारख्या चित्रपटांतून त्याने आपली ओळख निर्माण केली. 'ब्रो' या चित्रपटात त्याला काका पवन कल्याण यांच्यासोबत काम करण्याची संधी मिळाली होती. आता साखरपुड्याच्या वृत्तामुळे साई दुर्गा तेज पुन्हा एकदा चर्चेत आला आहे.