आयुष्मान खुरानाला धमकी देणाऱ्या आरोपीला बंगळूरुमध्ये अटक

मुंबई
ayushmann khurrana बॉलिवूड अभिनेता आयुष्मान खुराना याला सोशल मीडियावर धमकीचे संदेश पाठवून कोट्यवधी रुपयांची मागणी केल्याप्रकरणी मुंबई गुन्हे शाखेने मोठी कारवाई केली आहे. या प्रकरणात ३० वर्षीय वैभव मिश्रा याला बंगळुरूमधून अटक करण्यात आली आहे. विशेष म्हणजे, आरोपी आयआयटी पदवीधर असल्याची माहिती समोर आली आहे. पोलिसांच्या प्राथमिक तपासात त्याने केवळ खोडसाळपणा करण्याच्या उद्देशाने हे कृत्य केले असावे, असा अंदाज व्यक्त करण्यात येत आहे. मात्र, त्यामागे खंडणी उकळण्याचा हेतू होता की निव्वळ गंमत म्हणून त्याने धमकी दिली, याचा सखोल तपास पोलीस करत आहेत.

नेमके प्रकरण काय?

आयुष्मान खुराना याला लॉरेन्स बिश्नोई टोळीच्या नावाने धमकी देणारा ऑडिओ संदेश पाठवण्यात आला होता. या संदेशातून अभिनेत्याकडे कोट्यवधी रुपयांची मागणी करण्यात आल्याची माहिती समोर आली होती. संदेश पाठवणाऱ्या व्यक्तीने आपण लॉरेन्स बिश्नोई टोळीशी संबंधित असल्याचे सांगत पैसे न दिल्यास गंभीर परिणाम भोगावे लागतील, अशा स्वरूपाची धमकी दिल्याचे सांगण्यात येते. या घटनेची माहिती मिळताच मुंबई पोलिसांनी तपासाची चक्रे वेगाने फिरवली.

धमकीच्या संदेशातील आवाज खरोखरच लॉरेन्स बिश्नोई टोळीशी संबंधित व्यक्तीचा आहे की कोणीतरी या टोळीचे नाव वापरून अभिनेत्याला धमकावण्याचा प्रयत्न केला, याचा शोध पोलीस घेत होते. यासाठी संबंधित ऑडिओ संदेशाची उपलब्ध ध्वनिमुद्रणांशी तुलना करण्याची प्रक्रिया सुरू होती. तपासादरम्यान वैभव मिश्रा याचा या प्रकरणातील सहभाग समोर आल्यानंतर त्याला बंगळुरूमधून ताब्यात घेण्यात आले. आता त्याने धमकी देण्यामागे नेमका कोणता उद्देश ठेवला होता, याची चौकशी केली जात आहे.

बॉलिवूड कलाकारांना धमक्यांचे सत्र सुरूच

बॉलिवूडमधील कलाकारांना कुख्यात गुंडांच्या नावाने धमक्या देण्याच्या घटनांमध्ये अलीकडे वाढ झाल्याचे दिसत आहे. आयुष्मान खुराना याच्या प्रकरणापूर्वी अभिनेता तुषार कपूर यालाही अशाच प्रकारे धमकी देण्यात आली होती. हरी बॉक्सरचा हस्तक असल्याचा दावा करणाऱ्या एका व्यक्तीने तुषार कपूरकडे पाच कोटी रुपयांची खंडणी मागितली होती. मात्र, पोलिसांनी संबंधित फोनवरील आवाजाची हरी बॉक्सरशी संबंधित पूर्वीच्या धमकीच्या संदेशांमधील आवाजाशी तुलना केली असता, धमकी देणारी व्यक्ती हरी बॉक्सर नसल्याचे स्पष्ट झाले होते.

दरम्यान, १८ ऑक्टोबर रोजी जुहू परिसरात अभिनेता टायगर श्रॉफ याच्या गाडीवर झालेल्या गोळीबाराच्या घटनेनेही चित्रपटसृष्टीतील कलाकारांच्या सुरक्षेचा प्रश्न ऐरणीवर आला होता. टायगर फुटबॉलच्या मैदानातून बाहेर पडत असताना मोटारसायकलवरून आलेल्या सशस्त्र हल्लेखोरांनी त्याच्या वाहनावर अनेक गोळ्या झाडल्या होत्या. या हल्ल्यात टायगरचा वाहनचालक आणि एका रिक्षाचालकासह तिघे जण जखमी झाले होते. सुदैवाने टायगर या हल्ल्यातून बचावला. या घटनेची जबाबदारी लॉरेन्स बिश्नोई टोळीने स्वीकारल्याचे वृत्तही समोर आले होते.

आयुष्मान खुराना याला आलेली धमकी आणि यापूर्वीच्या घटनांमुळे बॉलिवूडमधील कलाकारांच्या सुरक्षेचा मुद्दा पुन्हा चर्चेत आला आहे. गुंडांच्या नावाचा वापर करून कलाकारांना धमकावण्यामागे खरोखरच संघटित गुन्हेगारीचा सहभाग आहे की काही व्यक्ती या नावांचा गैरवापर करत आहेत, हे तपासातून स्पष्ट होणार आहे.