६० दिवस झोपली अन् कमावले ९.६ लाख रुपये

Earned 9.6 lakh rupees by sleeping for 60 days झोपण्यासाठी पैसे मिळू शकतात, अशी कल्पना कदाचित अनेकांना स्वप्नवत वाटेल. मात्र, मुंबईच्या जिनिया चॅटर्जी हिने हे स्वप्न प्रत्यक्षात साकार केले आहे. तब्बल ६० दिवस चाललेल्या झोपेच्या अनोख्या स्पर्धेत तिने विजेतेपद पटकावले असून, ९.६ लाख रुपयांचे घसघशीत बक्षीस मिळवले आहे. वेकफिट कंपनीने आयोजित केलेल्या 'स्लीप इंटर्नशिप'च्या पाचव्या पर्वाची ती विजेती ठरली. या स्पर्धेसाठी देशभरातून दोन लाखांहून अधिक अर्ज आले होते. त्यातून केवळ १० स्पर्धकांची निवड करण्यात आली. स्पर्धकांना नियमित वेळेत झोपणे, पुरेशी विश्रांती घेणे आणि दर आठवड्याला दिलेली विविध आव्हाने पूर्ण करणे आवश्यक होते. संपूर्ण ६० दिवसांच्या कालावधीत त्यांच्या झोपेचा कालावधी आणि गुणवत्ता यांची नोंद ठेवून त्यानुसार गुण दिले जात होते.

 

 

 

 

 

या उपक्रमात केवळ झोपेच्या सवयींवर लक्ष केंद्रित करण्यात आले नव्हते, तर स्पर्धकांच्या कल्पकतेलाही वाव देण्यात आला होता. 'स्लीप सिनेमा' या आव्हानात लोकप्रिय चित्रपटांमधील प्रसंगांना झोपेशी संबंधित वेगळे स्वरूप देऊन त्यांची पुनर्निर्मिती करायची होती. 'स्लीप बिंगो'मध्ये आठवडाभरातील झोपेच्या सवयी तपासल्या जात होत्या. तर 'अंडरकव्हर स्लीप मिशन'मध्ये संभाषणादरम्यान समोरच्या व्यक्तीला संशय येऊ न देता 'ब्लँकेट' आणि 'पिलो' हे शब्द प्रत्येकी नव्हे, तर एकत्रितपणे १० वेळा वापरण्याचे आव्हान होते. प्रत्येक आठवड्यात उत्कृष्ट कामगिरी करणाऱ्या स्पर्धकाला 'प्रो स्लीपर ऑफ द वीक' हा किताब दिला जात होता. अंतिम टप्प्यात रत्नागिरीचा मणिकंदन, जिनिया चॅटर्जी आणि मेहेक खोत यांनी आघाडीची तीन स्थाने मिळवली. दुसरीकडे, हैदराबादच्या करीम खानने साप्ताहिक सर्जनशील आव्हानांमध्ये सर्वाधिक वेळा यश मिळवल्यामुळे त्याला 'वाइल्ड कार्ड' प्रवेश देण्यात आला. त्यामुळे अंतिम फेरीत चार स्पर्धकांमध्ये विजेतेपदासाठी स्पर्धा रंगली.

 

 

'बिग बेड' नावाने आयोजित करण्यात आलेली अंतिम फेरी रिअॅलिटी शोच्या धर्तीवर पार पडली. यामध्ये 'मेमरी फोम चॅलेंज'अंतर्गत दाखवलेल्या छायाचित्रांप्रमाणे बेडरूमची मांडणी पुन्हा तयार करण्याचे आव्हान होते. यात स्मरणशक्ती, निरीक्षणक्षमता आणि सांघिक कामगिरी तपासण्यात आली. त्यानंतर झालेल्या 'स्लीप ऑक्शन'मध्ये उशा, चादरी, वातानुकूलन यंत्रणेचे नियंत्रण, खोलीतील प्रकाश आणि आवाजाची व्यवस्था अशा झोपेसाठी आवश्यक सुविधांसाठी स्पर्धकांना बोली लावावी लागली. या वेळी सूत्रसंचालक आणि सोशल मीडिया इन्फ्लुएन्सर अनुज गुप्ता याने रॅपच्या स्वरूपात अंगाईगीतही सादर केले. अंतिम रात्रीच्या झोपेच्या कामगिरीला विजेतेपद निश्चित करताना विशेष महत्त्व देण्यात आले. सर्व गुणांची तुलना केल्यानंतर जिनिया चॅटर्जी हिला विजेती घोषित करण्यात आले. तिला ९.६ लाख रुपयांचे बक्षीस आणि प्रायोजित सुट्टी देण्यात आली. विशेष म्हणजे, २०१९ मध्ये सुरू झालेल्या या उपक्रमाच्या पहिल्या चार पर्वांमध्ये १० लाखांहून अधिक अर्ज प्राप्त झाले होते. आतापर्यंत एकूण ६५ इंटर्नना प्रत्येकी एक लाख रुपयांचे विद्यावेतन देण्यात आले आहे. झोपेला एका अनोख्या स्पर्धेचे स्वरूप देणाऱ्या वेकफिटच्या या उपक्रमाचे पाचवे पर्वही विशेष चर्चेत आले आहे.