‘राइज अँड फॉल २’चा शहजाद पूनावाला ठरला विजेता

मुंबई
Shehzad Poonawalla छोट्या पडद्यावरील लोकप्रिय रिअॅलिटी शो ‘राइज अँड फॉल’च्या दुसऱ्या पर्वाचा विजेता अखेर जाहीर झाला आहे. सहा आठवडे रंगलेल्या संघर्ष, मैत्री, मतभेद आणि नाट्यमय घडामोडींनंतर शहजाद पूनावाला याने विजेतेपदावर आपले नाव कोरले आहे. अंतिम फेरीत इतर स्पर्धकांना मागे टाकत त्याने ट्रॉफीसह ३५ लाख रुपयांचे रोख पारितोषिकही पटकावले. मात्र, विजेतेपद मिळाल्यानंतर शहजादने घेतलेल्या एका निर्णयामुळे त्याचे विशेष कौतुक होत आहे. बक्षिसाच्या रकमेतून मिळालेले संपूर्ण ३५ लाख रुपये आसाम आणि बिहारमधील पूरग्रस्त नागरिकांच्या मदतीसाठी मुख्यमंत्री मदत निधीत जमा करणार असल्याची घोषणा त्याने अंतिम सोहळ्याच्या मंचावरून केली.

‘राइज अँड फॉल २’चा ग्रँड फिनाले टॉप सहा स्पर्धकांच्या दमदार सादरीकरणाने सुरू झाला. त्यानंतर ‘फॉर्च्युन फ्लोअर पिरॅमिड’ या आव्हानात निहारिका तिवारी हिला स्पर्धेतून बाहेर पडावे लागले. तिच्यानंतर करण पटेल आणि स्वरा भास्कर यांचाही प्रवास संपुष्टात आला. ‘टॉवर लाइट्स’ या टास्कनंतर प्रियंका चाहर चौधरी, गौतम गुलाटी आणि शहजाद पूनावाला यांनी अंतिम तीन स्पर्धकांमध्ये स्थान मिळवले. अखेर अभिनेता आणि माजी क्रिकेटपटू वीरेंद्र सेहवाग याने विजेत्याच्या नावाची घोषणा केली. त्यावेळी शहजाद पूनावाला याला विजेता घोषित करण्यात आले. प्रियंका चाहर चौधरी हिने प्रथम उपविजेतेपद, तर गौतम गुलाटी याने द्वितीय उपविजेतेपद मिळवले.

विजेतेपद मिळाल्यानंतर शहजादने आपल्या भावना व्यक्त करताना हा प्रवास अजिबात सोपा नसल्याचे सांगितले. ‘राइज अँड फॉल २’ जिंकण्याचा अनुभव शब्दांत मांडणे कठीण असल्याचे त्याने नमूद केले. शोमधील परिस्थितीनुसार स्वतःमध्ये सतत बदल करणे आणि प्रतिकूल परिस्थितीतही पुढे जात राहणे आवश्यक होते. अनेकदा स्वतःच्या क्षमतेबद्दल शंका निर्माण झाली; मात्र मनाच्या एका कोपऱ्यात आपण हा शो जिंकू शकतो, असा विश्वास कायम होता. आज हातात विजेतेपदाची ट्रॉफी घेऊन उभा असताना तो विश्वास खरा ठरल्याचे त्याने सांगितले. दृढ निश्चय असेल, तर कोणतेही ध्येय साध्य करता येऊ शकते, हे या विजयातून सिद्ध झाल्याची भावनाही त्याने व्यक्त केली.

या विजयी भाषणादरम्यान शहजादने आपल्या बक्षिसाच्या रकमेबाबत महत्त्वाची घोषणा केली. यापूर्वीच आपण जिंकलेली रक्कम गरजूंच्या मदतीसाठी दान करणार असल्याचे सांगितले होते, याची आठवण करून देत त्याने संपूर्ण ३५ लाख रुपये आसाम आणि बिहारमधील पूरग्रस्तांच्या मदतीसाठी मुख्यमंत्री मदत निधीत देणार असल्याचे जाहीर केले. या निर्णयामुळे त्याच्या विजयाला सामाजिक बांधिलकीची जोड मिळाली आहे.

आपल्या प्रवासातील अनुभवांविषयी बोलताना शहजादने प्रत्येक निर्णयाबद्दल समाधान व्यक्त केले. शोदरम्यान आलेल्या चढ-उतारांतही आपण आपले व्यक्तिमत्त्व आणि स्वभाव कायम जपला, याचा आनंद असल्याचे त्याने सांगितले. स्पर्धेदरम्यान निर्माण झालेली नाती, केलेली मस्ती, एकत्र घालवलेले क्षण आणि मिळालेल्या आठवणी या ट्रॉफीपेक्षाही अधिक मौल्यवान असल्याचे त्याने नमूद केले. हातात विजेतेपदाची ट्रॉफी, मनात अविस्मरणीय आठवणी आणि आपल्याकडून शक्य ते सर्व प्रयत्न केल्याचे समाधान घेऊन आपण घरी जात असल्याची भावना त्याने व्यक्त केली.

एकीकडे ‘राइज अँड फॉल २’चे विजेतेपद मिळाल्याचा आनंद, तर दुसरीकडे लाखो रुपयांचे बक्षीस पूरग्रस्तांच्या मदतीसाठी देण्याचा निर्णय, यामुळे शहजाद पूनावाला सध्या चर्चेत आहे. त्याच्या या घोषणेचे सोशल मीडियावरही कौतुक होत आहे.