गलगोटियास विद्यापीठचा रोबोट वाद चिघळला; समिटमधून स्टॉल हटवण्याचे आदेश

Galgotias University robot controversy rages on गलगोटियास विद्यापीठ भोवतीचा रोबोटिक कुत्र्याचा वाद अधिकच चिघळला असून अखेर प्रदर्शन स्थळ रिकामे करण्याचे आदेश देण्यात आल्याची माहिती समोर आली आहे. राष्ट्रीय राजधानीतील भारत मंडपम येथे सुरू असलेल्या ‘इंडिया एआय इम्पॅक्ट समिट’दरम्यान विद्यापीठाच्या स्टॉलवर “ओरियन” नावाने सादर करण्यात आलेल्या रोबोटबाबत प्रश्न उपस्थित झाले. तज्ञ आणि समाजमाध्यमांवरील वापरकर्त्यांनी या यंत्रमानवाच्या मूळ आणि दाव्यांच्या सत्यतेवर शंका घेतल्यानंतर आयोजकांनी कठोर भूमिका घेतली.

 

 

 

वादाची ठिणगी तेव्हा पडली, जेव्हा सादर करण्यात आलेला रोबोट हा प्रत्यक्षात चीनमधील युनिट्री रोबोटिक्स या कंपनीचे ‘गो२’ मॉडेल असल्याचे समोर आले. या यंत्रमानवाची बाजारातील किंमत अंदाजे दोन ते तीन लाख रुपयांच्या दरम्यान असल्याचे सांगितले जाते. विद्यापीठाने सुरुवातीला हा प्रकल्प विद्यार्थ्यांसाठी शैक्षणिक साधन म्हणून मांडल्याचा दावा केला; मात्र समाजमाध्यमांवर प्रसारित झालेल्या एका चित्रफितीत प्रतिनिधीने “आम्ही ते बनवले” असे वक्तव्य केल्याचे दिसून आले. त्या चित्रफितीत तो प्रकल्प विद्यापीठाच्या उत्कृष्टता केंद्राने विकसित केल्याचा उल्लेखही करण्यात आला होता.

 

या दाव्यांतील विसंगतीमुळे समिटच्या विश्वासार्हतेवर परिणाम होऊ नये, तसेच ‘मेक इन इंडिया’ ध्येयधोरणाशी सुसंगतता राखावी या कारणास्तव आयोजकांनी हस्तक्षेप केल्याचे सूत्रांनी सांगितले. बौद्धिक संपदा किंवा दिशाभूल करणाऱ्या दाव्यांबाबत कोणताही वाद निर्माण होऊ नये, यासाठी विद्यापीठाला आपला स्टॉल बंद करण्यास सांगण्यात आले. आंतरराष्ट्रीय स्तरावरील अशा व्यासपीठावरून माघार घ्यावी लागणे ही संबंधित संस्थेसाठी मोठी प्रतिमा हानी मानली जात आहे. दरम्यान, विद्यापीठाने अधिकृतपणे आदेशाबाबत सविस्तर प्रतिक्रिया दिलेली नाही. मात्र त्यांचा उद्देश विद्यार्थ्यांना नवतंत्रज्ञानाची ओळख करून देणे हाच होता, असे स्पष्टीकरण देण्यात आले आहे. समीक्षकांचे मत आहे की हा रोबोट तृतीय पक्षाच्या उत्पादनाप्रमाणे स्पष्टपणे सादर केला असता, तर इतका वाद निर्माण झाला नसता.