टेकऑफनंतर सहा मिनिटांत विमान कोसळले

Turkish F-16 fighter jet crash तुर्कीमध्ये मंगळवारी मध्यरात्रीच्या सुमारास एफ-१६ लढाऊ विमानाचा भीषण अपघात झाला असून या दुर्घटनेत वैमानिकाचा मृत्यू झाला आहे. तुर्कीच्या संरक्षण मंत्रालयाने या घटनेची अधिकृत पुष्टी केली आहे. बालिकेसिर येथील नवव्या मुख्य जेट तळावरून उड्डाण केलेले हे विमान हवेत झेपावल्यानंतर अवघ्या काही मिनिटांत कोसळल्याची माहिती समोर आली आहे.

 

 

 

स्थानिक वेळेनुसार रात्री सुमारे १२ वाजून ५० मिनिटांनी विमानाने उड्डाण केले होते. मात्र १२ वाजून ५६ मिनिटांनी विमानाशी संपर्क तुटला. त्यानंतर तातडीने शोधमोहीम सुरू करण्यात आली. काही वेळातच अपघातग्रस्त विमानाचे अवशेष सापडले आणि वैमानिकाचा मृत्यू झाल्याची खात्री झाली.बालिकेसिरचे राज्यपाल इस्माइल उस्ताओग्लू यांनी या घटनेबद्दल शोक व्यक्त करत मृत वैमानिकाला श्रद्धांजली वाहिली. त्यांनी कुटुंबीयांना धीर देण्याची प्रार्थना केली तसेच राष्ट्रासाठी ही मोठी हानी असल्याचे म्हटले.

 

 

 

संरक्षण मंत्रालयाने सांगितले की अपघाताचे नेमके कारण शोधण्यासाठी विशेष चौकशी समिती स्थापन करण्यात आली आहे. चौकशी पूर्ण झाल्यानंतरच कारण स्पष्ट होईल. तसेच स्थानिक अभियोक्ता कार्यालयानेही स्वतंत्र तपास सुरू केला आहे.इस्तंबूल-इझमीर महामार्गाजवळील कारेसी परिसरात विमानाचे तुकडे विखुरलेले आढळले. सुरक्षा दल, अग्निशमन पथके आणि वैद्यकीय पथके तात्काळ घटनास्थळी दाखल झाली. तुर्की हवाई दलासाठी ही मोठी हानी मानली जात असून, अलीकडील काळात घडलेला हा आणखी एक गंभीर अपघात आहे. राष्ट्रपती, संरक्षण मंत्री आणि इतर वरिष्ठ अधिकाऱ्यांनीही मृत वैमानिकाच्या कुटुंबियांच्या दुःखात सहभागी होत शोक व्यक्त केला आहे.