५६ वर्षीय व्यक्तीने संबंधापूर्वी घेतल्या गोळ्या आणि...Pre-coital pills

Pre-coital pills गुरुग्राम येथे बसस्थानकाजवळील एका हॉटेलमध्ये ५६ वर्षीय व्यक्तीचा संशयास्पद मृत्यू झाल्याची घटना बुधवारी समोर आली. संबंधित व्यक्ती आपल्या महिला मैत्रिणीसोबत हॉटेलमध्ये थांबला होता. खोलीची पाहणी करताना पोलिसांना शक्तीवर्धक औषधांच्या रिकाम्या पट्ट्या आढळून आल्या, त्यामुळे सुरुवातीला अतिसेवनामुळे मृत्यू झाला असावा असा संशय व्यक्त करण्यात आला. मात्र शवविच्छेदनाच्या प्राथमिक अहवालात मृत्यूचे कारण हृदयविकाराचा झटका असल्याचे नमूद करण्यात आले आहे.

 

 

 

पोलिसांनी दिलेल्या माहितीनुसार, मृत व्यक्ती हरियाणा राज्यातील सोहना जवळील गावचा रहिवासी होता आणि एका मालवाहतूक कंपनीत वाहनचालक म्हणून कार्यरत होता. तो बुधवारी आपल्या शाळेतील ओळखीच्या महिलेसोबत गुरुग्राममधील हॉटेलमध्ये गेला होता. महिलेच्या सांगण्यानुसार, खोलीत असताना त्याला अचानक तीव्र छातीत दुखू लागले. परिस्थिती गंभीर होताच तिने तात्काळ रुग्णवाहिका बोलावली आणि पोलिसांना कळवले.

 

त्याला जवळील खासगी रुग्णालयात नेण्यात आले, परंतु डॉक्टरांनी तपासणीनंतर त्याला मृत घोषित केले. गुरुवारी शवविच्छेदन करण्यात आले. डॉक्टरांच्या पथकाने दिलेल्या प्राथमिक अहवालानुसार मृत्यू हृदयविकारामुळे झाला आहे. तरीही खोलीत सापडलेल्या औषधांच्या पट्ट्यांमुळे त्याने वैद्यकीय सल्ल्याविना शक्तीवर्धक औषधे घेतली असावीत आणि त्याचा हृदयावर परिणाम झाला असावा, अशी शक्यता तपासात विचाराधीन आहे. दरम्यान, मृत व्यक्तीच्या कुटुंबावर दुःखाचा डोंगर कोसळला आहे. त्याच्या मुलाचे लग्न १२ मार्च रोजी होणार असल्याने घरात आनंदाचे वातावरण होते आणि लग्नाची तयारी सुरू होती. मात्र अचानक घडलेल्या या घटनेमुळे कुटुंबीयांना मोठा धक्का बसला आहे. गुरुवारी मृतदेह नातेवाईकांच्या ताब्यात देण्यात आला असून पोलिस पुढील तपास करत आहेत.