गो-रक्षक बाबा चंद्रशेखर यांचा अपघातात मृत्यू

Death of cow protector Baba Chandrashekhar उत्तर प्रदेशातील मथुरा येथे गायींच्या तस्करीविरोधात काम करणारे आणि ‘फरसा वाले बाबा’ म्हणून ओळखले जाणारे संत चंद्रशेखर यांचा एका वाहनाच्या धडकेत मृत्यू झाल्याची घटना घडली आहे. या घटनेनंतर परिसरात मोठा तणाव निर्माण झाला असून, नागरिकांमध्ये तीव्र संताप व्यक्त केला जात आहे. मिळालेल्या माहितीनुसार, पहाटेच्या सुमारास काही जण गायी घेऊन जात असल्याची माहिती मिळाल्यानंतर बाबा चंद्रशेखर यांनी त्यांचा पाठलाग सुरू केला. ते आपल्या दुचाकीवरून निघाले असताना, संबंधित तस्करांनी त्यांना अडवण्याचा प्रयत्न केला. यावेळी झालेल्या धक्क्यात ते खाली पडले आणि त्यानंतर एका वाहनाखाली चिरडले गेल्याने त्यांचा जागीच मृत्यू झाला.

 

 

 

घटनेनंतर स्थानिक नागरिक आणि गो-रक्षकांनी तात्काळ एका आरोपीला पकडून पोलिसांच्या ताब्यात दिले, तर इतर आरोपी घटनास्थळावरून पळून गेले. पोलिसांनी फरार आरोपींचा शोध सुरू केला आहे.या घटनेची माहिती पसरताच मोठ्या संख्येने लोक दिल्ली-आग्रा महामार्गावर जमले आणि रास्ता रोखला. त्यामुळे वाहतूक ठप्प झाली आणि परिसरात तणाव निर्माण झाला होता. जमावाने प्रशासनाविरोधात घोषणाबाजी करत काही प्रमाणात दगडफेकही केली. या परिस्थितीमुळे घटनास्थळी गोंधळ उडाला आणि काही काळासाठी पोलिसांनाही मागे हटावे लागले. नंतर मोठ्या प्रमाणावर सुरक्षा दल तैनात करून परिस्थिती नियंत्रणात आणण्यात आली.