नवादात नक्षलवादी कट उधळला, ४० किलो स्फोटके जप्त

Naxalite conspiracy foiled in Nawad बिहारमधील नवादा जिल्ह्यात सुरक्षा यंत्रणांनी मोठी कारवाई करत नक्षलवादी हालचालींना मोठा धक्का दिला आहे. राज्य दहशतवादविरोधी पथक आणि स्थानिक पोलिसांनी संयुक्त मोहिम राबवून एका बंदी घातलेल्या संघटनेशी संबंधित दोन कार्यकर्त्यांना अटक केली. ही कारवाई राजौली परिसरात करण्यात आली. मिळालेल्या गुप्त माहितीनंतर पोलिसांनी परिसरात सापळा रचून छापा टाकला आणि संशयितांना ताब्यात घेतले. प्राथमिक चौकशीत हे दोघेही बराच काळ या संघटनेशी जोडलेले असल्याचे समोर आले असून, परिसरात हिंसक कारवाया वाढवण्याचा त्यांचा प्रयत्न असल्याची शक्यता वर्तवली जात आहे.

 

 

 

अटकेदरम्यान पोलिसांनी मोठ्या प्रमाणात घातक साहित्य जप्त केले. यात बंदुका, जिवंत काडतुसे, स्फोटक साहित्य, विद्युत स्फोटक यंत्रणा आणि वायर यांचा समावेश आहे. एवढ्या मोठ्या प्रमाणावर स्फोटके सापडल्यामुळे एखाद्या मोठ्या हल्ल्याचा कट रचला जात असल्याचा संशय व्यक्त केला जात आहे. अटक करण्यात आलेल्या संशयितांची ओळख दयानंद राजवंशी आणि मिथलेश राजवंशी अशी पटली आहे. त्यांच्याकडून पुढील तपासासाठी अधिक माहिती मिळवण्याचा प्रयत्न सुरू आहे. या प्रकरणी स्थानिक पोलीस ठाण्यात गुन्हा दाखल करण्यात आला असून तपास अधिक वेगाने सुरू आहे.