एप्रिलपासून दिल्लीत वीज महागण्याची शक्यता

Electricity expensive in Delhi राजधानीतील नागरिकांसाठी महत्त्वाची बातमी समोर येत आहे. एप्रिल महिन्यापासून दिल्लीत वीजदर वाढण्याची शक्यता व्यक्त केली जात आहे. वीज वितरण करणाऱ्या खासगी कंपन्यांची तब्बल ३८ हजार कोटी रुपयांहून अधिक थकबाकी सरकारकडून फेडण्याची तयारी सुरू असल्याने या निर्णयाचा परिणाम थेट वीजदरांवर होण्याची शक्यता आहे. दिल्ली सरकारकडून तीन वीज वितरण कंपन्यांची मोठी आर्थिक देणी भागवण्याचा विचार सुरू असून त्यामुळे वीजदर वाढण्याचा मार्ग मोकळा होऊ शकतो. मात्र, या वाढीचा थेट भार नागरिकांवर पडू नये यासाठी सरकारकडून अनुदान देण्याची शक्यता देखील वर्तवली जात आहे. त्यामुळे प्रत्यक्षात ग्राहकांवर किती परिणाम होईल, याबाबत अद्याप स्पष्टता नाही.

 

 

 

दरम्यान, मागील वर्षी ऑगस्ट महिन्यात सर्वोच्च न्यायालयाने दिल्लीतील तीन खासगी वीज वितरण कंपन्यांना सात वर्षांच्या कालावधीत वहन खर्चासह २७ हजार २०० कोटी रुपयांची नियामक मालमत्ता अदा करण्याचे निर्देश दिले होते. या कंपन्यांमध्ये बीआरपीएल, बीवायपीएल आणि टीपीडीडीएल यांचा समावेश आहे. यापैकी बीआरपीएलवर सुमारे १९ हजार १७४ कोटी रुपये, बीवायपीएलवर १२ हजार ३३३ कोटी रुपये आणि टीपीडीडीएलवर ७ हजार ४६ कोटी रुपयांचे देणे असल्याचे समोर आले आहे.गेल्या दशकभरात आम आदमी पक्षाच्या सरकारच्या काळात वीजदरात वाढ झालेली नाही. त्यामुळे साचलेला खर्च आता मोठ्या प्रमाणात वाढला असून त्याचा परिणाम पुढील काळात दरवाढीच्या रूपाने दिसू शकतो.

 

दरम्यान, आंतरराष्ट्रीय घडामोडींमुळे स्वयंपाकाच्या गॅसच्या पुरवठ्यावर आधीच परिणाम झाला असून अनेक ठिकाणी नागरिकांना सिलिंडर मिळवण्यासाठी प्रतीक्षा करावी लागत आहे. अशा परिस्थितीत वीजदर वाढल्यास सर्वसामान्यांच्या आर्थिक अडचणी आणखी वाढण्याची शक्यता आहे. राजकीय दृष्टिकोनातूनही हा मुद्दा महत्त्वाचा मानला जात आहे. स्वस्त वीज देण्याच्या आश्वासनावर मोठा जनाधार निर्माण केलेल्या केजरीवाल सरकारसमोर आता संतुलन राखण्याचे आव्हान उभे ठाकले आहे. वीजदर वाढले तर त्याचे राजकीय परिणामही जाणवू शकतात, अशी चर्चा सध्या सुरू आहे.