आमचे हल्ले थांबणार नाहीत!

Netanyahu's clear message पश्चिम आशियातील वाढत्या संघर्षाच्या पार्श्वभूमीवर इस्रायलने आपली कठोर भूमिका कायम ठेवत इराण आणि लेबनॉनवरील कारवाया सुरूच राहतील, असे स्पष्ट केले आहे. इस्रायलचे इस्रायलचे पंतप्रधान बेंजामिन नेतान्याहू यांनी अमेरिकेचे अध्यक्ष डोनाल्ड ट्रम्प यांच्याशी झालेल्या चर्चेनंतर ही भूमिका जाहीर केली. त्यांनी सांगितले की, अमेरिकेच्या लष्करी यशाचा फायदा घेत कराराद्वारे युद्धकालीन उद्दिष्टे साध्य करण्याचा प्रयत्न सुरू आहे आणि त्यातून इस्रायलच्या महत्त्वाच्या हितांचे संरक्षण होईल. नेतान्याहू यांनी पुढे स्पष्ट केले की, इराण तसेच लेबनॉनमध्ये कारवाया सुरूच आहेत. इराणच्या क्षेपणास्त्र व अणु कार्यक्रमाला धक्का देण्यासाठी प्रयत्न सुरू असून लेबनॉनमधील हिजबुल्लाविरोधातही सातत्याने कारवाई होत आहे. अलीकडेच दोन अणुशास्त्रज्ञांचा मृत्यू झाल्याचा उल्लेख करत त्यांनी कारवाई आणखी तीव्र करण्याचा इशारा दिला. कोणत्याही परिस्थितीत इस्रायल आपल्या सुरक्षेशी तडजोड करणार नाही, असेही त्यांनी ठामपणे सांगितले.

 

 

 

दुसरीकडे, डोनाल्ड ट्रम्पयांनी इराणविरोधातील काही कारवाया काही दिवसांसाठी पुढे ढकलल्याचे संकेत दिले आहेत. होर्मुझ सामुद्रधुनी उघडण्यासंदर्भात दिलेली अंतिम मुदतही वाढवण्यात आली असून, एका इराणी नेत्यासोबत संवाद सुरू असल्याचा दावा त्यांनी केला आहे. संभाव्य करारामध्ये इराणची अणु क्षमता पूर्णपणे नष्ट करण्याचा मुद्दा महत्त्वाचा असेल, असेही त्यांनी नमूद केले. मात्र, इराणने अशा कोणत्याही चर्चांना स्पष्ट नकार दिला आहे. अमेरिकेचे दावे दिशाभूल करणारे असल्याचा आरोप करत त्यांनी कोणतीही वाटाघाटी झालेली नसल्याचे सांगितले. या परस्परविरोधी विधानांमुळे परिस्थिती अधिकच गुंतागुंतीची बनली आहे. दरम्यान, तेलाच्या किमतीत घसरण आणि शेअर बाजारातील तेजी यामुळे काहीसा दिलासा मिळत असला तरी, एकूणच परिस्थिती अजूनही अनिश्चित असल्याचे चित्र दिसत आहे.