लेबनॉनमध्ये शांतता सैनिकांवर हल्ला

Peacekeepers attacked in Lebanon लेबनॉनमध्ये संयुक्त राष्ट्रांच्या शांतता मोहिमेवर भीषण हल्ला झाला. यामध्ये एका जवानाचा मृत्यू झाला तर दुसरा गंभीर जखमी झाला आहे. दक्षिण लेबनॉनमधील अल-कुसैर परिसरातील एका लष्करी ठिकाणी २९ मार्च रोजी हा स्फोट घडला. या घटनेची अधिकृत माहिती संयुक्त राष्ट्रांच्या मोहिमेकडून सोमवारी देण्यात आली. या स्फोटामागील कारण अद्याप स्पष्ट झालेले नाही. स्फोटक कोठून आले आणि कोण जबाबदार आहे याचा तपास सुरू करण्यात आला असून संपूर्ण घटनेची सखोल चौकशी केली जात आहे. संबंधित भाग हा सीमावर्ती असून तेथे दीर्घकाळापासून तणावाचे वातावरण आहे.

 

इस्रायल आणि इराणच्या पाठिंब्याने लढणाऱ्या हिजबुल्ला संघटनेतील संघर्षामुळे हा परिसर संवेदनशील मानला जातो. गेल्या काही वर्षांत शांतता राखण्यासाठी तैनात करण्यात आलेल्या जवानांवर वारंवार हल्ले होत असल्याच्या घटना समोर आल्या आहेत. यापूर्वीही मार्च महिन्याच्या सुरुवातीला घानाच्या जवानांच्या तळावर क्षेपणास्त्र हल्ला झाला होता, ज्यात दोन सैनिक गंभीर जखमी झाले होते. त्यामुळे या भागातील परिस्थिती अधिकच चिंताजनक बनली आहे.