वहिनीची हत्या आणि नग्न धावला दीर घेतला गळफास

Sister-in-law's murder उत्तर प्रदेशातील झांसी शहरात धक्कादायक घटना उघडकीस आली आहे. दीरानेच आपल्या वहिनीवर जीवघेणा हल्ला करून नंतर स्वतःही गळफास घेतल्याची घटना प्रेमनगर भागात घडली. या घटनेमुळे परिसरात मोठी खळबळ उडाली आहे. २८ फेब्रुवारी रोजी महेंद्र नावाच्या तरुणाने आपल्या मावस भावाच्या पत्नी माया हिच्यावर घरातच धारदार शस्त्राने हल्ला केला. तिच्या पोटावर, छातीवर, गळ्यावर आणि तोंडावर वार करत तिला गंभीर जखमी करण्यात आले. त्या वेळी तिचा पती कामानिमित्त बाहेर गेला होता, तर लहान मुलगी घरातच खेळत होती. अचानक झालेल्या हल्ल्यात मायाने प्रसंगावधान राखत आपल्या मुलीला तात्काळ तिथून पळून जाण्यास सांगितले. मुलगी बाहेर पडल्यामुळे तिचा जीव वाचल्याचे कुटुंबीयांनी सांगितले.

 

 

 

हल्ल्यानंतर आरोपीने रक्ताने माखलेले कपडे काढून टाकले आणि रस्त्यावरून पळ काढला. पोलिसांच्या ताब्यात जाण्यापूर्वीच पोलीस ठाण्यापासून सुमारे तीनशे मीटर अंतरावर त्याने झाडाला गळफास लावून आत्महत्या केली. दरम्यान, गंभीर जखमी अवस्थेत मायाला वैद्यकीय महाविद्यालयात दाखल करण्यात आले होते. काही दिवस मृत्यूशी झुंज दिल्यानंतर उपचारादरम्यान तिचा मृत्यू झाला. मायाच्या पतीने सांगितले की, तो अहमदाबाद येथे काम करत असताना त्याचे मायाशी लग्न झाले होते. काही काळानंतर महेंद्र आणि त्याच्या पत्नीबाबत संशय निर्माण झाल्याने तो झांशीला परतला होता. आपण ज्याच्यावर विश्वास ठेवला, त्याच्याकडूनच असा विश्वासघात झाल्याने आपण व्यथित झालो असल्याचे त्याने सांगितले.

महेंद्रला मदत म्हणून आपण त्याला सोबत आणले, त्याची राहण्याखाण्याची व्यवस्था केली; परंतु त्याच्याकडून असे कृत्य होईल, याची कल्पना नव्हती, असेही तो म्हणाला. प्रेमनगर पोलीस ठाण्याचे प्रभारी तुलसीराम पांडे यांनी सांगितले की, महिलेचा मृत्यू झाल्यानंतर तिचा मृतदेह ताब्यात घेऊन आवश्यक पंचनामा करण्यात आला असून शवविच्छेदनासाठी पाठवण्यात आला आहे. आरोपीने आधीच गळफास घेतल्याने पुढील कायदेशीर प्रक्रिया सुरू असल्याचे त्यांनी स्पष्ट केले. या दुहेरी मृत्यूमुळे संपूर्ण परिसरात भीती आणि संतापाचे वातावरण पसरले आहे.