सौदी अरेबिया-पाकिस्तानमध्ये चर्चा; युद्धाची शक्यता वाढली?

Talks between Saudi Arabia and Pakistan मध्यपूर्वेतील तणाव वाढत असताना पाकिस्तान आणि सौदी अरेबिया यांच्यातील लष्करी सहकार्य पुन्हा चर्चेत आले आहे. सौदी अरेबियाचे संरक्षण मंत्री प्रिन्स खालिद बिन सलमान यांनी पाकिस्तानचे लष्करप्रमुख असीम मुनीरयांची रियाध येथे भेट घेतली. या भेटीत अलीकडे इराणकडून होत असलेल्या हल्ल्यांबाबत तसेच त्यांना रोखण्यासाठी कोणत्या उपाययोजना करता येतील यावर सविस्तर चर्चा झाल्याची माहिती देण्यात आली आहे. या चर्चेदरम्यान दोन्ही देशांमधील संयुक्त संरक्षण सहकार्य अधिक बळकट करण्यावरही भर देण्यात आला.

 

 

प्रिन्स खालिद बिन सलमान यांनी केलेल्या निवेदनात म्हटले आहे की, या बैठकीत इराणकडून होणाऱ्या हल्ल्यांमुळे संपूर्ण प्रदेशातील शांतता आणि स्थैर्य धोक्यात येत असल्याची चिंता व्यक्त करण्यात आली. त्यांनी इराणने संयम राखावा आणि परिस्थिती अधिक बिघडेल असे पाऊल टाळावे, अशी अपेक्षाही व्यक्त केली.तज्ज्ञांच्या मते, इराणी धोक्यांचा सामना करताना सौदी अरेबिया आता एकट्याने लढण्याऐवजी आपल्या सहयोगी देशांची मदत घेण्याच्या तयारीत आहे. पाकिस्तान आणि सौदी अरेबिया यांच्यात असलेल्या संरक्षण सहकार्यामुळे गरज पडल्यास पाकिस्तानला मदतीसाठी पुढे यावे लागू शकते, असेही मानले जात आहे. सौदी अरेबिया पाकिस्तानला आर्थिक सहाय्य, तेलपुरवठा आणि गुंतवणूक यांद्वारे मोठा आधार देत असल्यामुळे या नातेसंबंधाला विशेष महत्त्व आहे. त्यामुळे भविष्यात परिस्थिती अधिक गंभीर झाली तर पाकिस्तान कोणती भूमिका घेणार याकडे जगाचे लक्ष लागले आहे.

दरम्यान, सौदी अरेबियावर होणाऱ्या हल्ल्यांची मालिका अद्याप सुरूच आहे. संरक्षण अधिकाऱ्यांनी दिलेल्या माहितीनुसार, शायबा तेल क्षेत्राच्या दिशेने येणारी सोळा मानवरहित विमाने चार वेगवेगळ्या टप्प्यांत रोखण्यात आली. ही सर्व साधने वाळवंटी भागातून येत होती आणि त्यांना हवेतच नष्ट करण्यात आले. तसेच अल-खार्जपरिसरातील सुलतान हवाई तळाच्या दिशेने येणारे एक दीर्घ पल्ल्याचे क्षेपणास्त्र आणि एक सुसज्ज क्षेपणास्त्र देखील अडवण्यात आले. अल-खर्ज हे रियाधपासून सुमारे ऐंशी किलोमीटर अंतरावर असलेले महत्त्वाचे औद्योगिक केंद्र मानले जाते.