अशोक खरातला १४ दिवसांची न्यायालयीन कोठडी

Ashok Kharat in judicial custody नाशिकमध्ये भोंदूगिरीच्या आरोपांमुळे चर्चेत आलेल्या अशोक खरात याला न्यायालयाने चौदा दिवसांची न्यायालयीन कोठडी सुनावली आहे. बुधवारी त्याला जिल्हा न्यायालयात हजर करण्यात आले होते. न्यायमूर्ती बी. एन. ईचपुराणी यांच्या न्यायासनासमोर ही सुनावणी झाली. पोलिस कोठडीची मुदत संपल्यानंतर त्याला पुन्हा न्यायालयात आणण्यात आले होते. विशेष तपास पथकाकडून सुरू असलेल्या चौकशीत अनेक धक्कादायक बाबी उघड झाल्याचे समोर येत आहे. त्याच्याविरोधात नव्या तक्रारी दाखल होत असून, आर्थिक फसवणूक, लैंगिक शोषण आणि इतर गंभीर प्रकारांमुळे प्रकरण अधिकच गुंतागुंतीचे झाले आहे. त्यामुळे कोठडी वाढवण्याची मागणी करण्यात आली होती.

 

 

 

 

न्यायालयातील कार्यवाही अत्यंत जलद पार पडली. अवघ्या काही मिनिटांत निर्णय देण्यात आला आणि त्यानंतर खरात न्यायालयातून बाहेर पडला. या सुनावणीदरम्यान कोणताही मोठा युक्तिवाद झाला नाही. न्यायालयाने कागदपत्रांची पाहणी करून निर्णय दिला. दरम्यान, तपास अधिकाऱ्यांनी न्यायालयात हजेरी लावली होती आणि प्रकरणाशी संबंधित माहिती सादर केली.चौकशीदरम्यान काही महत्त्वाच्या व्यक्तींना समोरासमोर बसवून विचारपूस करण्यात आली. यामध्ये एका पुजाऱ्यासह लेखापाल आणि सराफ व्यावसायिकाचाही समावेश होता. या चौकशीत मौल्यवान खडे, रत्न आणि सोन्याच्या व्यवहारांमध्ये फसवणूक केल्याचे संकेत मिळाले आहेत. तसेच बँक कर्ज प्रकरणातही संशयास्पद व्यवहार झाल्याची माहिती पुढे आली आहे. काही अधिकाऱ्यांना मोठी रक्कम दिल्याचा संशय तपास यंत्रणेला आहे. सोने खरेदी-विक्रीतून मोठा नफा मिळवण्याचे प्रकारही समोर येत आहेत. या सर्व प्रकरणाची सुरुवात एका महिलेने केलेल्या गंभीर आरोपांपासून झाली. तिने दिलेल्या तक्रारीनुसार, तिच्यावर अमानुष अत्याचार करण्यात आले होते. या प्रकरणी गुन्हा दाखल झाल्यानंतर खरातला अटक करण्यात आली. तो सिन्नर तालुक्यातील एका मंदिर ट्रस्टशी संबंधित असून अंकशास्त्रज्ञ म्हणून ओळखला जात होता. अनेक प्रभावशाली व्यक्ती त्याच्याकडे सल्ल्यासाठी जात असल्याची माहिती आहे. मात्र, त्याच्यावर लागलेल्या गंभीर आरोपांमुळे एकच खळबळ उडाली असून तपासाची दिशा दिवसेंदिवस अधिक गंभीर होत आहे.