अशोक खरात प्रकरणात चाकणकरांच्या बहिणीला नोटीस

समता पतसंस्थेत अनेक खाती एकाच दिवशी उघडण्यात आल्याचा संशय व्यक्त केला जात आहे. या खात्यांद्वारे मोठ्या प्रमाणावर आर्थिक उलाढाल झाल्याचे समोर आले आहे. आतापर्यंत अनेक खातेदारांची चौकशी पूर्ण झाली असून काहींनी आपल्या नावाने खाती उघडली गेल्याची माहिती नसल्याचे सांगितले आहे. तपास अधिकाऱ्यांनी या प्रकरणात सहभागी असलेल्या सर्व संबंधितांची चौकशी सुरू ठेवली असून पुढील काही दिवसांत आणखी धक्कादायक माहिती समोर येण्याची शक्यता वर्तवली जात आहे. आता प्रतिभा चाकणकर चौकशीसाठी कधी हजर होतात आणि त्यांच्या जबाबातून काय उलगडा होतो, याकडे सर्वांचे लक्ष लागले आहे. तपासादरम्यान खरातकडे कोट्यवधी रुपयांची मालमत्ता असल्याचे उघड झाले असून त्याचे नाशिक आणि अहिल्यानगर परिसरात मोठे आर्थिक व्यवहार असल्याचे समोर आले आहे. विशेष म्हणजे, तो अनेक बँक खात्यांशी संबंधित असल्याचे आढळले आहे. शंभरहून अधिक खात्यांमध्ये त्याचे नाव लाभार्थी म्हणून जोडले गेले असल्याची माहिती तपासात पुढे आली आहे. या खात्यांमधून कोट्यवधी रुपयांचे व्यवहार झाल्याचेही स्पष्ट झाले आहे.