काँग्रेस नेते पवन खेरा यांना अटकपूर्व जामीन

Pawan Khera granted bail काँग्रेस नेते पवन खेरा यांना तेलंगणा उच्च न्यायालयाकडून मोठा दिलासा मिळाला असून त्यांना एका प्रकरणात अटकपूर्व जामीन मंजूर करण्यात आला आहे. आसाममध्ये दाखल झालेल्या गुन्ह्याच्या पार्श्वभूमीवर त्यांनी दाखल केलेल्या याचिकेवर हा निर्णय देण्यात आला आहे. आसामचे मुख्यमंत्री हिमंता बिस्वा सरमा यांच्या पत्नीबाबत करण्यात आलेल्या कथित विधानांवरून पवन खेरा यांच्याविरुद्ध गुवाहाटी येथे गुन्हा नोंदवण्यात आला होता. या प्रकरणानंतर त्यांच्या अटकेची शक्यता निर्माण झाल्याने त्यांनी तेलंगणा उच्च न्यायालयात अटकपूर्व जामिनासाठी धाव घेतली होती.

 

 

 

 

या प्रकरणात न्यायालयाने त्यांना तात्पुरता दिलासा देत एका आठवड्याचा अटकपूर्व जामीन मंजूर केला असून त्या कालावधीत संबंधित न्यायालयात नियमित जामिनासाठी अर्ज करण्याचे निर्देश दिले आहेत. दरम्यान, या याचिकेवरील पुढील सुनावणी शुक्रवारपर्यंत पुढे ढकलण्यात आली आहे.सुनावणीदरम्यान दोन्ही बाजूंनी जोरदार युक्तिवाद करण्यात आले. पवन खेरा यांच्या वतीने बाजू मांडताना हा प्रकार राजकीय सूडबुद्धीतून प्रेरित असल्याचा आरोप करण्यात आला, तर आसाम सरकारच्या वतीने हा दावा फेटाळण्यात आला. तसेच ही याचिका तेलंगणा उच्च न्यायालयात चालवण्यास योग्य नसल्याचा मुद्दाही मांडण्यात आला.

 

 

पवन खेरा यांनी याचिकेत आपला वास्तव पत्ता हैदराबाद असल्याचे नमूद करत अटक झाल्यास तत्काळ जामिनावर सुटका मिळावी, अशी विनंती केली होती. त्यांच्या विरोधात भारतीय दंड संहितेतील विविध कलमांखाली गुन्हा नोंदवण्यात आला असून त्यामध्ये निवडणुकीसंदर्भातील कथित चुकीचे विधान आणि फसवणुकीचे आरोपही समाविष्ट आहेत. दरम्यान, संबंधित प्रकरणाची सुरुवात पवन खेरा यांनी आसामच्या मुख्यमंत्र्यांच्या पत्नीबाबत केलेल्या आरोपांपासून झाली होती. त्यानंतर पोलिसांनी चौकशीसाठी हालचाली सुरू केल्या होत्या आणि त्यांच्या दिल्लीतील निवासस्थानीही कारवाई करण्यात आली होती. या संपूर्ण प्रकरणामुळे राजकीय वातावरण तापले असून पुढील कायदेशीर घडामोडींवर सर्वांचे लक्ष लागले आहे.