कांकेरमध्ये कुख्यात नक्षल कमांडरचा खात्मा

Naxal commander killed in Kanker छत्तीसगडमधील कांकेर जिल्ह्यात सुरक्षा दलांनी मोठी कारवाई करत पाच लाख रुपयांचे बक्षीस घोषित असलेला नक्षलवादी कमांडर रुपी याला चकमकीत ठार केले आहे. छोटे बेटिया पोलीस ठाण्याच्या हद्दीत असलेल्या दाट जंगलात ही चकमक घडली. कारवाईनंतर घटनास्थळावरून त्याचा मृतदेह तसेच काही शस्त्रसामग्री जप्त करण्यात आली. गुप्त माहितीच्या आधारे सुरक्षा दलांनी या भागात शोधमोहीम सुरू केली होती. या मोहिमेदरम्यान नक्षलवाद्यांशी समोरासमोर चकमक झाली आणि त्यात रुपी ठार झाला.

 

 

 

पोलीस अधीक्षक निखिल राखेचा यांनी दिलेल्या माहितीनुसार, कारवाईनंतर परिसरात अजून काही नक्षलवादी लपून बसले आहेत का, याचा शोध घेण्यासाठी शोधमोहीम अधिक तीव्र करण्यात आली आहे. याआधीही मार्च २०२६ च्या सुरुवातीला विजापूर जिल्ह्यात नक्षलविरोधी कारवाईदरम्यान सुरक्षा दल आणि माओवाद्यांमध्ये चकमक झाली होती. इंद्रावती नदीच्या काठावर मिळालेल्या गुप्त माहितीच्या आधारे संयुक्त पथकाने ही मोहीम राबवली होती. शोधमोहीम सुरू असताना दोन्ही बाजूंमध्ये गोळीबार झाला आणि त्यात दोन माओवादी ठार झाले.

 

या कारवाईनंतर सुरक्षा दलांनी परिसरात तपास करताना मृत नक्षलवाद्यांचे मृतदेह ताब्यात घेतले तसेच मोठ्या प्रमाणावर शस्त्रसाठा जप्त केला. यात स्वयंचलित रायफल्स, बंदुका, स्फोटके आणि इतर साहित्याचा समावेश होता. नक्षलग्रस्त भागात सुरक्षा दलांकडून सातत्याने अशा मोहिमा राबवल्या जात असून नक्षलवादी हालचालींवर बारकाईने नजर ठेवली जात आहे.