भयानक...मुंबईत पार्टीत अमली पदार्थांच्या अति सेवनाने दोघांचा मृत्यू

drug overdose in Mumbai मुंबईतील गोरेगाव परिसरात आयोजित करण्यात आलेल्या एका संगीत कार्यक्रमादरम्यान घडलेल्या दुर्दैवी घटनेमुळे शहरात खळबळ उडाली आहे. या कार्यक्रमात अमली पदार्थांचे अति सेवन झाल्याने दोन महाविद्यालयीन तरुणांचा मृत्यू झाल्याची माहिती समोर आली आहे. मृतांमध्ये एका तरुणीचाही समावेश असल्याने या घटनेने सर्वत्र चिंता व्यक्त केली जात आहे. नेस्को संकुल येथे झालेल्या या कार्यक्रमाला हजारो तरुण-तरुणी उपस्थित होते. अंदाजे तीन ते चार हजारांच्या उपस्थितीत रंगलेल्या या कार्यक्रमादरम्यान काही जणांनी मोठ्या प्रमाणात मद्य आणि अमली पदार्थांचे सेवन केल्याचे सांगितले जात आहे. त्यानंतर काहींना अस्वस्थ वाटू लागले आणि त्यापैकी दोघांचा मृत्यू झाला.

 

 

या घटनेत आणखी काही तरुणांची प्रकृती बिघडली होती. त्यापैकी दोन तरुणींना हिंदू हृदयसम्राट बाळासाहेब ठाकरे ट्रॉमा केअर रुग्णालय येथे उपचारासाठी दाखल करण्यात आले होते. काहींना प्राथमिक उपचारानंतर घरी सोडण्यात आले असले तरी काहींची प्रकृती गंभीर असल्याचे समजते. घटनेनंतर वनराई पोलीस ठाणे येथे गुन्हा नोंदवण्यात आला असून पोलिसांनी तपास सुरू केला आहे. या प्रकरणात संबंधितांना अमली पदार्थ कोणी पुरवले, कोणत्या प्रकारचे पदार्थ वापरण्यात आले आणि आयोजकांची जबाबदारी काय होती, याचा सखोल तपास केला जात आहे. या घटनेमुळे महाविद्यालयीन वर्तुळात भीतीचे वातावरण निर्माण झाले असून अशा कार्यक्रमांच्या सुरक्षेबाबत प्रश्न उपस्थित केले जात आहेत.