१३ वर्षीय मुलीच्या लग्नाला न्यायालयाची मान्यता
Total Views |
कराची,
child-marriage : पाकिस्तानमध्ये एका १३ वर्षीय ख्रिश्चन मुलीच्या लग्नाला न्यायालयाने मान्यता दिल्यामुळे मोठा वाद निर्माण झाला आहे. या प्रकरणामुळे जबरदस्ती धर्मांतर आणि बालविवाहाच्या मुद्द्यावर पुन्हा एकदा तीव्र संताप व्यक्त केला जात आहे.
मिळालेल्या माहितीनुसार, अल्पवयीन मुलीचे अपहरण करून तिचे जबरदस्ती धर्मांतर करण्यात आले आणि नंतर तिचे लग्न लावण्यात आले, असा आरोप कुटुंबीयांनी केला आहे. मात्र, न्यायालयाने मुलगी स्वतःच्या इच्छेने विवाह केल्याचे मान्य करत लग्न वैध ठरवले आहे.
या निर्णयानंतर मानवाधिकार संघटना आणि अल्पसंख्याक गटांनी तीव्र नाराजी व्यक्त केली आहे. त्यांच्या मते, अल्पवयीन मुलीच्या “संमती”चा मुद्दा ग्राह्य धरला जाऊ शकत नाही आणि हा प्रकार जबरदस्ती धर्मांतर व बालविवाहाचा गंभीर प्रकार आहे.
या प्रकरणामुळे पाकिस्तानमध्ये अल्पसंख्याकांच्या सुरक्षिततेचा प्रश्न पुन्हा ऐरणीवर आला आहे. विशेषतः ख्रिश्चन आणि हिंदू मुलींना लक्ष्य करून जबरदस्ती धर्मांतर आणि विवाहाच्या घटनांबाबत आधीपासूनच चिंता व्यक्त केली जात होती. दरम्यान, या निर्णयाविरोधात देशांतर्गत तसेच आंतरराष्ट्रीय स्तरावर टीका होत असून, संबंधित कायद्यांमध्ये बदल करण्याची मागणी जोर धरत आहे.