नकाराचा फटका! ‘वंदे मातरम्’ न गायल्यानं थेट गुन्हा दाखल

vande-mataram-controversy : मध्य प्रदेशातील इंदूर येथे ‘वंदे मातरम्’ वाद प्रकरणात दोन कॉंग्रेस महिला नगरसेविकांविरोधात पोलिसांनी गुन्हा दाखल केला आहे. या घटनेमुळे राजकीय वातावरण तापले असून, मोठा वाद निर्माण झाला आहे.

 

 

मिळालेल्या माहितीनुसार, नगरपालिकेच्या बजेट बैठकीदरम्यान कॉंग्रेस नगरसेविका फौजिया शेख अलीम आणि रुबिना इक्बाल खान यांनी ‘वंदे मातरम्’ गाण्यास नकार दिला. त्यांनी धार्मिक कारणे देत हा निर्णय घेतल्याचे सांगितले. या घटनेनंतर सभागृहात गोंधळ उडाला आणि राजकीय आरोप-प्रत्यारोप सुरू झाले.

 

 

या प्रकरणाची तक्रार दाखल झाल्यानंतर पोलिसांनी तपास करून दोघींविरोधात भारतीय न्याय संहितेच्या कलम 196 अंतर्गत गुन्हा नोंदवला आहे. त्यांच्यावर समाजातील सौहार्द बिघडवल्याचा आरोप ठेवण्यात आला आहे.

 

 

पोलिसांनी दोन्ही नगरसेविकांना चौकशीसाठी बोलावून त्यांचे जबाबही नोंदवले आहेत. दरम्यान, या प्रकरणामुळे ‘वंदे मातरम्’ गाणे बंधनकारक आहे का, तसेच वैयक्तिक आणि धार्मिक स्वातंत्र्याचा प्रश्न पुन्हा ऐरणीवर आला आहे. या वादामुळे स्थानिक तसेच राज्य पातळीवर राजकीय वातावरण चांगलेच तापले असून, पुढील काळात या प्रकरणाचे पडसाद अधिक तीव्र होण्याची शक्यता व्यक्त केली जात आहे.