जग हादरवणारा मुंबई इंडियन्स स्वतःच हादरला! 'हा' खेळाडू बाहेर

Mumbai Indians player out : मुंबई इंडियन्स आयपीएल २०२६ मधील आपला पुढचा सामना १६ एप्रिल रोजी पंजाब किंग्सविरुद्ध खेळणार आहे. या सामन्यापूर्वी मुंबई संघाला मोठा धक्का बसला आहे. युवा फिरकी अष्टपैलू खेळाडू अथर्व अंकोलेकर दुखापतीमुळे चालू आयपीएल हंगामातून बाहेर पडला असून, त्याच्या जागी २१ वर्षीय पंजाबचा अष्टपैलू खेळाडू क्रिश भगतला संघात स्थान देण्यात आले आहे. त्याला ३० लाख रुपयांच्या मूळ किमतीत मुंबई इंडियन्सच्या संघात समाविष्ट करण्यात आले आहे.

 

 

 

 

आयपीएलच्या प्रसिद्धीपत्रकात म्हटले आहे की, दुखापतीमुळे आयपीएल २०२६ मधून बाहेर पडलेल्या अथर्व अंकोलेकरच्या जागी मुंबई इंडियन्सने क्रिश भगतला संघात घेतले आहे. २१ वर्षीय भगतने पंजाबसाठी सात प्रथम-श्रेणी आणि नऊ लिस्ट-ए सामने खेळले आहेत. तो उजव्या हाताचा मध्यम-वेगवान गोलंदाज असून त्याने लिस्ट-ए क्रिकेटमध्ये अर्धशतकही झळकावले आहे. तो फलंदाजी आणि गोलंदाजी दोन्हीमध्ये आपली भूमिका बजावू शकतो.

कृष भगतबद्दल बोलायचे झाल्यास, तो संघात संतुलन आणतो. तो खालच्या फळीत फलंदाजी करण्यासोबतच गोलंदाजीही करू शकतो. तो गेल्या दोन वर्षांपासून मुंबई इंडियन्सच्या निवड चाचणीचा भाग होता. तो २०२६ मध्ये डीवाय पाटील टी२० चषकात रिलायन्स संघाकडून खेळला होता आणि हंगामाच्या सुरुवातीपासून तो संघासोबत एक सहाय्यक गोलंदाज म्हणून आहे. अंकोलेकर २०२० मध्ये भारताच्या १९ वर्षांखालील विश्वचषक संघाचा भाग होता. अथर्वने बांगलादेशविरुद्धच्या १९ वर्षांखालील आशिया चषकाच्या अंतिम सामन्यात सामनावीर पुरस्कार जिंकला.

आयपीएल २०२६ मधील मुंबई इंडियन्सच्या कामगिरीबद्दल बोलायचे झाल्यास, त्यांनी कोलकाता नाईट रायडर्स (केकेआर) विरुद्ध विजय मिळवून हंगामाची सुरुवात केली. यानंतर, मुंबईला दिल्ली कॅपिटल्स, राजस्थान रॉयल्स आणि रॉयल चॅलेंजर्स बंगळूर यांच्याविरुद्ध तीन सामन्यांमध्ये सलग पराभव पत्करावे लागले. मुंबई इंडियन्स गुणतालिकेत नवव्या स्थानावर आहे. पंजाबविरुद्धच्या सामन्यात ते कशी कामगिरी करतात हे पाहणे उत्सुकतेचे ठरेल.