नारी शक्ती विधेयकावर वादळी चर्चा

Arvind Sawant महिला आरक्षणाशी संबंधित ‘नारी शक्ती वंदन’ दुरुस्ती विधेयक मंजूर करण्यासाठी केंद्र सरकारने बोलावलेल्या विशेष अधिवेशनात राजकीय वातावरण चांगलेच तापले आहे. पंतप्रधान नरेंद्र मोदी यांनी विधेयकाच्या उद्दिष्टांवर आणि सरकारच्या भूमिकेवर सविस्तर भाष्य करताना विरोधकांवर टीका केली. दरम्यान, या चर्चेत शिवसेना (ठाकरे गट) खासदार अरविंद सावंत यांनी जोरदार हस्तक्षेप करत केंद्र सरकारच्या दाव्यांना प्रत्युत्तर दिले.

 

 

पंतप्रधान मोदी यांनी विधेयक आणण्यामागील सरकारची भूमिका स्पष्ट करताना, काही विरोधकांचा याला विरोध असल्याचा आरोप केला होता. या पार्श्वभूमीवर बोलताना अरविंद सावंत यांनी सरकारच्या या मांडणीवर आक्षेप घेतला. महिला आरक्षणाच्या मुद्द्यावर विरोधकांना अन्यायकारकपणे लक्ष्य केले जात असल्याचा आरोप त्यांनी केला.सावंत म्हणाले की, महिला आरक्षण विधेयक २०२३ मध्येच मंजूर झाले असून त्यावेळी कुठलाही ठोस विरोध झाला नव्हता. आता मात्र विरोधक महिला आरक्षणाच्या विरोधात आहेत, असा अर्थ काढला जात असल्याबाबत त्यांनी सवाल उपस्थित केला. संसदेत उपस्थित असलेल्या सर्व सदस्यांसमोर अशी भूमिका मांडणे चुकीचे असल्याचेही त्यांनी सूचित केले.आपल्या भाषणात सावंत यांनी महाराष्ट्राच्या ऐतिहासिक वारशाचा उल्लेख करत महिलांच्या सन्मानाची परंपरा अधोरेखित केली. छत्रपती शिवाजी महाराज, राजमाता जिजाऊ, Arvind Sawant  अहिल्याबाई होळकर, ताराराणी आणि झाशीची राणी लक्ष्मीबाई यांचा उल्लेख करत त्यांनी महाराष्ट्राने महिलांच्या सन्मानाला नेहमीच अग्रक्रम दिल्याचे सांगितले. महिलांचा अपमान सहन न करणाऱ्या छत्रपती शिवाजी महाराजांच्या आदर्शांचा दाखला देत त्यांनी या भूमिकेला ऐतिहासिक संदर्भ दिला.

महिला आरक्षणाला विरोध करण्याचा प्रश्नच उद्भवत नाही, असे स्पष्ट करत सावंत यांनी सरकारच्या आरोपांवर प्रश्नचिन्ह उपस्थित केले. विधेयकाच्या चर्चेदरम्यान निर्माण झालेल्या या राजकीय वादामुळे संसदेतील वातावरण अधिकच तापल्याचे दिसून आले आहे.