पाकिस्तानमध्ये गॅस वाहिनी फुटल्याने ८ ठार

Gas pipeline burst in Pakistan पाकिस्तानातील खैबर पख्तुनख्वा प्रांतात हरिपूर जिल्ह्यातील औद्योगिक भागात गॅस वाहिनीत मोठा स्फोट होऊन भीषण दुर्घटना घडली. या घटनेत किमान आठ जणांनी जीव गमावला असून अनेकजण गंभीररीत्या जखमी झाले आहेत. ही घटना हरिपूरमधील हत्तार औद्योगिक वसाहतीत, ग्रँड ट्रंक मार्गालगत असलेल्या एका कारखान्याजवळ घडल्याची माहिती समोर आली आहे. स्फोट अत्यंत तीव्र असल्याने त्यानंतर लगेचच मोठी आग भडकली आणि आसपासच्या परिसरात वेगाने पसरली. जवळील एका घरालाही आगीची झळ बसल्यामुळे नुकसानीत आणखी भर पडली आणि मदतकार्य अधिक कठीण झाले. घटनास्थळी धाव घेतलेल्या आपत्कालीन सेवांनी सांगितले की, अनेकजण गंभीररीत्या भाजले असून त्यांच्यावर उपचार सुरू आहेत.

 

 

 

दरम्यान, आग लागल्यानंतर परिसरात अडकलेल्या नागरिकांना वाचवण्यासाठी मोठ्या प्रमाणावर प्रयत्न करण्यात आले. या बचाव मोहिमेत चार महिलांसह सहा लहान मुलांना सुरक्षित बाहेर काढण्यात यश आले. मात्र काही महिला आणि मुले गंभीर भाजल्याने त्यांची प्रकृती चिंताजनक असल्याचे सांगितले जात आहे. हरिपूरचे उपायुक्त वसीम अहमद यांनी दिलेल्या माहितीनुसार, या दुर्घटनेतील अनेकांचा मृत्यू धुरामुळे गुदमरल्याने झाल्याचा प्राथमिक अंदाज व्यक्त करण्यात आला आहे. सध्या घटनास्थळी मदत आणि बचावकार्य सुरू असून जखमींना जवळच्या रुग्णालयात हलविण्यात आले आहे. गॅस वाहिनीचा स्फोट नेमका कशामुळे झाला, याचे कारण अद्याप स्पष्ट झालेले नाही. स्फोटाचा आवाज दूरवरपर्यंत ऐकू गेल्याने परिसरात भीतीचे वातावरण निर्माण झाले होते.