डिजिटल प्लॅटफॉर्मवर ‘बड़की बहू छोटकी बहू’ची धूम

Badki Bahu Chhotki Bahu movie भोजपुरी चित्रपटसृष्टीतील कुटुंबप्रधान कथांना प्रेक्षकांकडून मिळणारा प्रतिसाद आजही तितकाच उत्स्फूर्त आहे. गावाकडच्या पार्श्वभूमीवर आधारित, नातेसंबंधांतील गोड-तिखट क्षण उलगडणारे चित्रपट प्रेक्षकांना आपलेसे वाटतात. बदलत्या डिजिटल युगात या चित्रपटांची लोकप्रियता आणखी वाढली असून, थिएटरपलीकडे जाऊन मोबाईल, यूट्यूब आणि ओटीटी प्लॅटफॉर्मवरही ते मोठ्या प्रमाणात पाहिले जात आहेत.

 

पूर्वी चित्रपटाच्या यशाचे एकमेव मोजमाप बॉक्स ऑफिस मानले जात असे. मात्र आता यूट्यूब आणि विविध ओटीटी प्लॅटफॉर्ममुळे चित्रपटांची पोहोच व्यापक झाली आहे. अनेकदा थिएटरमध्ये मर्यादित प्रतिसाद मिळालेला चित्रपट डिजिटल माध्यमांवर प्रदर्शित झाल्यानंतर प्रचंड लोकप्रिय ठरतो. विशेषतः कुटुंबासोबत पाहण्याजोगे चित्रपट इंटरनेटवर दीर्घकाळ प्रेक्षकांचे लक्ष वेधून घेतात.

याच पार्श्वभूमीवर 2024 मध्ये प्रदर्शित झालेला ‘बड़की बहू छोटकी बहू’ हा भोजपुरी चित्रपट सध्या विशेष चर्चेत आहे. या चित्रपटाचे दिग्दर्शन मंजुल ठाकुर यांनी केले असून, कथाही त्यांनीच लिहिली आहे. चित्रपटाची सर्वात मोठी जमेची बाजू म्हणजे त्यातील दमदार स्टारकास्ट. यात रानी चटर्जी आणि काजल राघवानी या दोन लोकप्रिय अभिनेत्री पहिल्यांदाच जेठानी-देवरानीच्या भूमिकेत एकत्र झळकल्या आहेत. याशिवाय अंशुमान सिंह राजपूत, जय यादव आणि मनोज टायगर यांनीही महत्त्वपूर्ण भूमिका साकारल्या आहेत.चित्रपटाची कथा एका कुटुंबाभोवती फिरते. पती-पत्नीमधील वादामुळे घराचे दोन भाग पडतात आणि त्यांच्या मध्ये भिंत उभी राहते. बाहेरून पाहता दोन्ही सुना सतत भांडताना दिसतात, मात्र प्रत्यक्षात त्यांच्यातील नातं घट्ट आणि प्रेमळ असतं. त्या दोघी मिळून तुटलेलं कुटुंब पुन्हा एकत्र आणण्याचा प्रयत्न करतात. या भावनिक कथानकामुळे प्रेक्षकांनी चित्रपटाला मोठ्या प्रमाणात पसंती दिली आहे.

थिएटरमध्ये मर्यादित प्रदर्शन असूनही डिजिटल प्लॅटफॉर्मवर या चित्रपटाने अक्षरशः धुमाकूळ घातला आहे. यूट्यूबवरील विविध क्लिप्स आणि सीनना कोट्यवधी व्ह्यूज मिळाले असून, प्रेक्षकांचा उत्स्फूर्त प्रतिसाद दिसून येत आहे. विशेष म्हणजे IMDb वर या चित्रपटाला 8.2 इतकी दमदार रेटिंग मिळाली आहे, जी भोजपुरी चित्रपटांसाठी महत्त्वाची कामगिरी मानली जाते.चित्रपटाच्या कमाईचे अधिकृत आकडे जाहीर झाले नसले तरी डिजिटल माध्यमांवरील यश लक्षात घेता ‘बड़की बहू छोटकी बहू’ हा मोठा हिट ठरल्याचे मानले जात आहे.