लढाऊ विमानाचे हार्ड लँडिंग

Pune airport incident पुणे आंतरराष्ट्रीय विमानतळावर शुक्रवारी रात्री भारतीय हवाई दलाच्या (IAF) लढाऊ विमानाचे लँडिंगदरम्यान हार्ड लँडिंग झाल्याने काही काळ तणावपूर्ण परिस्थिती निर्माण झाली. या घटनेत कोणतीही जीवितहानी किंवा नागरी मालमत्तेचे नुकसान झाले नसल्याचे विमानतळ प्रशासनाने स्पष्ट केले आहे. घटनेनंतर तातडीने हालचाली करत विमानतळ प्रशासनाने परिसरात सुरक्षा व्यवस्था कडक करत ‘अलर्ट मोड’ जाहीर केला.

 

 

मिळालेल्या माहितीनुसार, लँडिंग प्रक्रियेदरम्यान तांत्रिक बिघाड झाल्याने विमानाचे हार्ड लँडिंग झाले. या घटनेनंतर धावपट्टी काही काळासाठी बंद ठेवण्यात आली होती. परिणामी, विमानतळावरील उड्डाण सेवा विस्कळीत झाली असून सुमारे 30 हून अधिक उड्डाणांवर परिणाम झाल्याचे सांगण्यात येत आहे. प्रवाशांची गैरसोय टाळण्यासाठी विमानतळ प्रशासनाने तातडीने पर्यायी व्यवस्था सुरू केली.

पुणे विमानतळ Pune airport incident येथील धावपट्टीची तातडीने तपासणी व दुरुस्तीचे काम सुरू करण्यात आले आहे. सुरक्षा तपासण्या पूर्ण झाल्यानंतर टप्प्याटप्प्याने उड्डाणे पुन्हा सुरू करण्याची प्रक्रिया हाती घेण्यात आली आहे.या घटनेनंतर केंद्रीय नागरी विमान वाहतूक राज्यमंत्री मुरलीधर मोहोळ यांनी परिस्थितीवर बारकाईने लक्ष ठेवले असल्याची माहिती दिली आहे. त्यांच्या म्हणण्यानुसार, या अपघातात कोणतीही नागरी हानी झाली नसून विमानातील वैमानिक पूर्णपणे सुरक्षित आहेत. भारतीय हवाई दल, विमानतळ प्रशासन आणि संबंधित यंत्रणा समन्वयाने परिस्थिती लवकरात लवकर पूर्ववत करण्यासाठी प्रयत्नशील आहेत.दरम्यान, घटनेनंतर विमानतळ परिसरात सुरक्षा व्यवस्था अधिक कडक करण्यात आली असून सर्व यंत्रणांना सतर्क राहण्याचे आदेश देण्यात आले आहेत. प्रवाशांना होणारी गैरसोय कमी करण्यासाठी आवश्यक त्या सुविधा आणि मार्गदर्शन उपलब्ध करून देण्यात येत आहे.या घटनेमुळे काही काळ प्रवाशांमध्ये गोंधळाचे वातावरण निर्माण झाले असले तरी सध्या परिस्थिती नियंत्रणात असल्याचे प्रशासनाने स्पष्ट केले आहे. विमानतळावरील कामकाज हळूहळू पूर्ववत होत असून लवकरच संपूर्ण उड्डाण सेवा नियमित होणार असल्याची अपेक्षा व्यक्त केली जात आहे.