नियंत्रण सुटलेली मालगाडी थेट प्लांटमध्ये घुसली!
Total Views |
बोकारो,
jharkhand-accident : झारखंडमधील बोकारो येथे एक धक्कादायक घटना घडली असून नियंत्रण सुटलेली मालगाडी थेट थर्मल पॉवर प्लांटच्या गेटला धडकली. या वेळी गेटजवळ उभी असलेली एक स्कॉर्पिओ गाडीही या अपघातात चिरडली गेली. सुदैवाने या घटनेत मोठी जीवितहानी टळली असली तरी परिसरात मोठी भीतीचे वातावरण निर्माण झाले आहे.
मिळालेल्या माहितीनुसार, ही मालगाडी अचानक नियंत्रणाबाहेर गेल्याने ती वेगाने पुढे जात प्लांटच्या मुख्य प्रवेशद्वारावर आदळली. धडक इतकी जोरदार होती की गेट पूर्णपणे उद्ध्वस्त झाले आणि जवळ उभी असलेली स्कॉर्पिओ गाडीही मोठ्या प्रमाणात नुकसानग्रस्त झाली.
घटनेनंतर तात्काळ स्थानिक प्रशासन आणि रेल्वे अधिकाऱ्यांनी घटनास्थळी धाव घेतली. सुदैवाने अपघाताच्या वेळी त्या ठिकाणी जास्त लोकांची गर्दी नव्हती, त्यामुळे मोठी जीवितहानी टळली. मात्र काही जण किरकोळ जखमी झाल्याची माहिती समोर आली आहे.
या अपघाताचे नेमके कारण अद्याप स्पष्ट झाले नसले तरी तांत्रिक बिघाड किंवा ब्रेक फेल झाल्याची शक्यता वर्तवली जात आहे. या प्रकरणाचा सखोल तपास सुरू असून सुरक्षा उपाययोजनांबाबतही प्रश्न उपस्थित केले जात आहेत.