दहशतवाद्यांच्या हल्ल्यात ११ गावकऱ्यांचा मृत्यू

Pubaagu village attack ईशान्य नायजेरियातील बोर्नो राज्यात एका दुर्गम गावावर इस्लामिक दहशतवाद्यांनी रात्री उशिरा केलेल्या हल्ल्यात ११ गावकऱ्यांचा मृत्यू झाला असून दोन जण गंभीर जखमी झाले आहेत. या हल्ल्यात अनेक घरे जाळण्यात आली असल्याची माहिती स्थानिक अधिकाऱ्यांनी बुधवारी दिली.

 

 

मिळालेल्या माहितीनुसार, मंगळवारी रात्री बोर्नो राज्यातील सांबिसा जंगलाच्या सीमेलगत असलेल्या पुबागु गावावर हल्लेखोरांनी अचानक चढाई केली. या हल्ल्यात मोठ्या प्रमाणात गोळीबार व जाळपोळ करण्यात आली. हल्ल्यानंतर काही वेळातच हल्लेखोर घटनास्थळावरून पसार झाले.स्थानिक प्रशासनाने या हल्ल्यासाठी बोको हराम या दहशतवादी संघटनेला जबाबदार धरले आहे. पुबागु गाव हे पूर्वी तुलनेने सुरक्षित मानले जात होते, मात्र या हल्ल्यामुळे परिसरात भीतीचे वातावरण निर्माण झाले आहे.

 

 

हल्ल्यानंतर गावकऱ्यांनी बुधवारी Pubaagu village attack मृतांवर अंत्यसंस्कार केले. जखमींवर जवळच्या रुग्णालयात उपचार सुरू असल्याचे अधिकाऱ्यांनी सांगितले आहे. स्थानिक परिषद अध्यक्ष म्वाडा सैदू उबा यांनी या घटनेबाबत तीव्र चिंता व्यक्त करताना सांगितले की, या भागात यापूर्वी असा गंभीर हल्ला कधीही झाला नव्हता.स्थानिक वॉर्ड अधिकारी उस्मान रुमिरगो यांनी दिलेल्या माहितीनुसार, हल्लेखोरांनी अनेक घरांना आग लावली आणि मोठ्या प्रमाणात नुकसान केले. नायजेरियातील ग्रामीण आणि दुर्गम भागांमध्ये इस्लामिक अतिरेकी संघटना तसेच सशस्त्र दरोडेखोरांकडून अशा प्रकारचे हल्ले वारंवार होत असल्याचे चित्र आहे.नायजेरियामध्ये बोको हरामसह इस्लामिक स्टेट वेस्ट आफ्रिका प्रोव्हिन्स (ISWAP) सारख्या अतिरेकी संघटना सक्रिय आहेत. याशिवाय इतर सशस्त्र गटही खंडणी, अपहरण आणि अवैध क्रियाकलापांमध्ये गुंतलेले असल्याने देशातील सुरक्षा परिस्थिती अधिक गुंतागुंतीची बनली आहे.