'सेक्सटॉर्शन' करून महिला क्रिकेटपटूचा कारणामा उघडकीस

Mumbai sextortion case सोशल मीडियावर झालेल्या ओळखीतून सुरू झालेल्या मैत्रीचा गैरफायदा घेत कथित सेक्सटॉर्शन आणि खंडणीचा प्रकार उघडकीस आला असून, मुंबई गुन्हे शाखेने जम्मू आणि काश्मीर टी-२० लीगशी संबंधित एका महिला क्रिकेटपटूसह तिचा भाऊ आणि त्यांच्या साथीदाराला अटक केली आहे. या प्रकरणात नवी दिल्ली आणि श्रीनगर येथे कारवाई करत तिघांना ताब्यात घेण्यात आले आहे.

 

 

अटक करण्यात Mumbai sextortion case आलेल्या आरोपींमध्ये ३० वर्षीय फरखांदा खान, तिचा २७ वर्षीय भाऊ बाझिल खान आणि त्यांचा कथित साथीदार उद्दीन इम्तियाज वानी (वय २२) यांचा समावेश आहे. फरखांदा आणि बाझिल खान यांना नवी दिल्लीतील एका हॉटेलमधून अटक करण्यात आली, तर उद्दीन इम्तियाज वानी याला श्रीनगर येथून ताब्यात घेण्यात आले.

पोलिसांनी दिलेल्या माहितीनुसार, तक्रारदार व्यावसायिकाची २०२३ मध्ये फरखांदाशी सोशल मीडियावर ओळख झाली होती. सुरुवातीला साध्या संभाषणातून सुरू झालेला संवाद पुढे वाढत गेला आणि दोघांमध्ये मैत्रीचे संबंध निर्माण झाले. मात्र, नंतर फरखांदाने कथितपणे पीडित व्यक्तीचे कॉल रेकॉर्ड करून आणि त्याच्या चॅट्सचे स्क्रीनशॉट जतन करून ठेवले.

यानंतर हे संभाषण आणि रेकॉर्डिंग सार्वजनिक करण्याची धमकी देत पैशांची मागणी करण्यात आल्याचा आरोप आहे. भीतीपोटी पीडित व्यक्तीने सुरुवातीला २३.६१ लाख रुपये दिल्याचे सांगितले जाते. त्यानंतर अधिक रक्कमेसाठी दबाव वाढत गेला आणि बाझिल खान तसेच त्यांच्या साथीदाराकडूनही धमक्या देण्यात आल्याचा आरोप आहे. एकूण मिळून सुमारे ४० लाख रुपयांची खंडणी रोख आणि ऑनलाइन व्यवहारांद्वारे वसूल केल्याचे तक्रारीत नमूद करण्यात आले आहे.

तक्रार प्राप्त होताच मुंबई पोलिसांच्या गुन्हे गुप्तचर विभागाने (CIU) तपास सुरू करून तांत्रिक पुरावे आणि माहितीच्या आधारे तिन्ही आरोपींचा शोध घेतला. त्यानंतर समन्वित कारवाई करत नवी दिल्ली आणि श्रीनगर येथे छापे टाकून अटक करण्यात आली.दरम्यान, या प्रकरणाचा अधिक तपास सुरू असून, या टोळीने अशाच प्रकारे इतर व्यक्तींनाही लक्ष्य केले आहे का, याचा शोध पोलिसांकडून घेतला जात आहे. या घटनेमुळे सोशल मीडियावरील ओळखी आणि डिजिटल संवादांच्या सुरक्षिततेबाबत पुन्हा एकदा चिंता व्यक्त केली जात आहे.