गणवेशातील रील्स पडल्या महागात 'अधिकारी निलंबित'

Shabana Azmi suspension सोशल मीडियावर पोलीस गणवेशात रील्स तयार करून पोस्ट केल्याच्या आरोपावरून पूर्णिया महिला पोलीस ठाण्याच्या प्रमुख शबाना आझमी यांना निलंबित करण्यात आले आहे. बिहार पोलीस मुख्यालयाने या प्रकरणाची गंभीर दखल घेत विभागीय नियमांचे उल्लंघन केल्याप्रकरणी कठोर कारवाई केली आहे. याच प्रकरणात आणखी दोन महिला पोलीस कर्मचाऱ्यांवरही निलंबनाची कारवाई करण्यात आल्याची माहिती समोर आली आहे.

 

 

पोलीस मुख्यालयाने जारी केलेल्या मानक कार्यप्रणालीचे (SOP) पालन न करता गणवेशात वैयक्तिक सोशल मीडिया सामग्री तयार करणे आणि ती सार्वजनिक करणे हे शिस्तभंगाचे गंभीर उल्लंघन मानले जात असल्याचे स्पष्ट करण्यात आले आहे. या पार्श्वभूमीवर पूर्णिया पोलीस अधीक्षकांच्या निर्देशानुसार संबंधित कारवाई करण्यात आली.मिळालेल्या माहितीनुसार, शबाना आझमी या त्यांच्या सोशल मीडिया खात्यावर पोलीस गणवेशात रील्स व्हिडिओ तयार करून नियमितपणे पोस्ट करत होत्या. हे व्हिडिओ ड्यूटीदरम्यान किंवा गणवेशात तयार करण्यात येत असल्याचा आरोप असून, ते विभागीय नियमांच्या विरोधात असल्याचे अधिकाऱ्यांनी सांगितले आहे. कारवाईनंतर संबंधित सर्व व्हिडिओ सोशल मीडिया खात्यावरून हटवण्यात आले आहेत.

शबाना आझमी यांचे Shabana Azmi suspension  नाव यापूर्वीही सोशल मीडियावरील काही वादग्रस्त पोस्टमुळे चर्चेत आले होते. याआधी फणीश्वरनाथ रेणू टीओपीच्या स्टेशन प्रमुखपदी असताना त्यांनी आपल्या वृद्ध आजोबांचा स्टेशन प्रमुखांच्या खुर्चीवर बसलेला फोटो व्हायरल केला होता, ज्यामुळे त्यावेळीही वाद निर्माण झाला होता.दरम्यान, पोलीस प्रशासनाने स्पष्ट केले आहे की, गणवेशातील पोलीस कर्मचाऱ्यांनी सोशल मीडिया वापरताना अत्यंत शिस्तबद्धता राखणे आवश्यक आहे. गोपनीयता, विभागीय शिस्त आणि पोलीस दलाची प्रतिष्ठा धोक्यात येईल अशी कोणतीही कृती स्वीकारली जाणार नाही, असेही प्रशासनाकडून सांगण्यात आले आहे.या घटनेमुळे पोलीस दलातील सोशल मीडिया वापराबाबतच्या नियमांचे काटेकोर पालन किती आवश्यक आहे, हा मुद्दा पुन्हा एकदा चर्चेत आला आहे.