अबब... निवडणुकीपूर्वी काँग्रेस उमेदवाराचा 'तुपात हात'

tamil nadu election तामिळनाडू विधानसभा निवडणुकीच्या पार्श्वभूमीवर मतदानाच्या आदल्या दिवशी मोठी कारवाई उघडकीस आली आहे. तामिळनाडूमध्ये २३ एप्रिल रोजी मतदान सुरु झाले आहे, २२ एप्रिल रोजी निवडणूक भरारी पथकाने (FST) श्रीवैकुंठम येथे काँग्रेसच्या उमेदवार उर्वशी एस. अमृतराज यांच्या निवासस्थानी छापा टाकून सुमारे ६.५ दशलक्ष रुपयांची बेहिशेबी रोकड जप्त केली.

 

 

निवडणूक अधिकाऱ्यांना मतदारांना वाटपासाठी मोठ्या प्रमाणात रोख रक्कम साठवून ठेवल्याची माहिती मिळाल्यानंतर ही कारवाई करण्यात आली. निवडणूक अधिकारी पोनमारी यांच्या नेतृत्वाखालील पथकाने तुतीकुडी जिल्हातील गणेश नगर परिसरातील निवासस्थानी झडती घेतली. या कारवाईत घरामध्ये लपवून ठेवलेली मोठी रक्कम आढळून आली.

झडतीदरम्यान सापडलेल्या tamil nadu election पैशांसंदर्भात कोणतेही वैध कागदपत्र सादर करण्यात न आल्याने अधिकाऱ्यांनी ती रक्कम जप्त केली. नंतर ही रोकड स्थानिक दक्षिण पोलीस ठाण्याकडे सुपूर्द करण्यात आली. या प्रकरणी पोलिसांनी काचना विलाई येथील सुरेश नावाच्या व्यक्तीला ताब्यात घेतले असून, पैशांचा स्रोत आणि त्यामागील उद्देश याबाबत सखोल तपास सुरू आहे. विशेषतः ही रक्कम मतदारांना वाटपासाठी वापरण्यात येणार होती का, याचा तपास अधिकारी करत आहेत.दरम्यान, तामिळनाडूमध्ये २३४ विधानसभा जागांसाठी २३ एप्रिल रोजी मतदान सुरु झाले. मतमोजणी ४ मे रोजी होणार आहे. या निवडणुकीत सत्ताधारी द्रमुक आघाडी आणि प्रमुख विरोधी पक्ष एआयएडीएमके यांच्यात मुख्य लढत अपेक्षित आहे. याशिवाय, अभिनेता विजय यांच्या टीव्हीके या नव्या पक्षाच्या सहभागामुळे निवडणूक अधिकच चुरशीची बनली आहे.निवडणुकीपूर्वी घडलेल्या या कारवाईमुळे राजकीय वातावरण तापले असून, मतदारांवर प्रभाव टाकण्याच्या प्रयत्नांवर निवडणूक आयोगाने कठोर पावले उचलल्याचे स्पष्ट झाले आहे.