बंगालमध्ये पाच पोलीस अधिकारी निलंबित

Election Commission action in Bengal पश्चिम बंगालमधील निवडणूक प्रक्रियेच्या पार्श्वभूमीवर निवडणूक आयोगाने मोठी कारवाई करत डायमंड हार्बर पोलीस जिल्ह्यातील पाच पोलीस अधिकाऱ्यांना निलंबित केले आहे. या कारवाईमध्ये एका अतिरिक्त पोलीस अधीक्षक आणि उपविभागीय पोलीस अधिकाऱ्याचाही समावेश आहे. निवडणुकीच्या पहिल्या टप्प्यात निष्पक्षता न राखल्याचा आणि पक्षपाती वर्तन केल्याचा आरोप या अधिकाऱ्यांवर ठेवण्यात आला आहे.आयोगाने या प्रकरणात संबंधित अधिकाऱ्यांविरुद्ध शिस्तभंगाची पुढील प्रक्रिया सुरू करण्याचे आदेश दिले आहेत. तसेच निवडणुकीशी संबंधित संवेदनशील प्रकरणे हाताळताना अधीनस्थ अधिकाऱ्यांवर नियंत्रण ठेवण्यात आणि निष्पक्षता सुनिश्चित करण्यात अपयश आल्याच्या कारणावरून डायमंड हार्बरच्या पोलीस अधीक्षकांना तंबी देण्यात आली आहे. या सर्व निर्देशांची तात्काळ अंमलबजावणी करण्यास सांगण्यात आले असून पुढील सकाळपर्यंत अनुपालन अहवाल सादर करण्याचे आदेशही देण्यात आले आहेत.

 

 

 

निलंबित अधिकाऱ्यांमध्ये डायमंड हार्बर येथील अतिरिक्त पोलीस अधीक्षक, उपविभागीय पोलीस अधिकारी, डायमंड हार्बर पोलीस ठाण्याचे प्रभारी अधिकारी, फाल्टा पोलीस ठाण्याचे प्रभारी अधिकारी आणि उस्ती पोलीस ठाण्याच्या प्रभारी अधिकाऱ्यांचा समावेश आहे. या सर्वांविरुद्ध पुढील शिस्तभंगात्मक कारवाई करण्यात येणार असल्याचे स्पष्ट करण्यात आले आहे. दरम्यान, निवडणूक आयोगाच्या आकडेवारीनुसार पश्चिम बंगालमध्ये मतदानाच्या पहिल्या टप्प्यात मोठ्या प्रमाणात मतदानाची नोंद झाली आहे. काही जिल्ह्यांमध्ये अत्यंत उच्च मतदान टक्केवारी दिसून आली आहे. दक्षिण दिनाजपूर, कूचबिहार, बीरभूम, जलपाईगुरी आणि मुर्शिदाबाद या जिल्ह्यांमध्ये मतदानाचे प्रमाण लक्षणीय असल्याचे समोर आले आहे. एकूणच राज्यात विक्रमी मतदान झाल्याचे चित्र दिसत असून या पार्श्वभूमीवर आयोगाने प्रशासनातील निष्पक्षतेवर कठोर भूमिका घेतली आहे.