बंगालमध्ये खळबळ! मतदानाआधीच सापडले १०० बाँब

desi-bomb-seized : पश्चिम बंगालमध्ये विधानसभा निवडणुकीच्या पार्श्वभूमीवर मोठी धक्कादायक घटना समोर आली आहे. दक्षिण २४ परगणा जिल्ह्यातील भांगार परिसरात एका कथित तृणमूल काँग्रेस कार्यकर्त्याच्या घरातून सुमारे १०० जिवंत देशी बाँब जप्त करण्यात आले आहेत. तृणमूल काँग्रेसशी संबंधित व्यक्तीच्या घरावर पोलिसांनी गुप्त माहितीनुसार छापा टाकला असता ही कारवाई करण्यात आली.

 

 

 

 

ही घटना निवडणुकीच्या दुसऱ्या टप्प्याच्या मतदानाच्या काही दिवस आधी उघड झाल्यामुळे राज्यात खळबळ उडाली आहे. पोलिसांनी तात्काळ बाँब निष्क्रिय करत पुढील तपास सुरू केला आहे. या प्रकरणानंतर राजकीय वातावरणही तापले असून, विविध पक्षांकडून एकमेकांवर आरोप-प्रत्यारोप सुरू झाले आहेत.

 

निवडणूक आयोगाने या घटनेची गंभीर दखल घेत सुरक्षा यंत्रणांना कडक सूचना दिल्या आहेत. संवेदनशील भागांमध्ये पोलीस आणि केंद्रीय सुरक्षा दलांची तैनाती वाढवण्यात आली आहे, जेणेकरून मतदान शांततेत पार पडेल.

 

दरम्यान, या घटनेमुळे निवडणुकीदरम्यान कायदा-सुव्यवस्था राखण्याचे मोठे आव्हान प्रशासनासमोर उभे राहिले असून, मतदारांमध्येही काही प्रमाणात भीतीचे वातावरण निर्माण झाले आहे.