नव्या रूपात ‘लालपरी’; “आपली बस, आपली सेवा” मोहिमेची सुरुवात

msrtc-campaign-2026 : महाराष्ट्र राज्य रस्ते वाहतूक महामंडळ अर्थात एसटी महामंडळाने प्रवाशांचा विश्वास परत मिळवण्यासाठी “आपली बस, आपली सेवा” ही नवी मोहीम सुरू करण्याचा निर्णय घेतला आहे. राज्याचे परिवहन मंत्री प्रताप सरनाईक यांनी या उपक्रमाची घोषणा केली. १ मे २०२६ पासून ही मोहीम संपूर्ण राज्यात राबवली जाणार आहे.

 

 

 

 

महामंडळाकडे बसांची संख्या वाढत असली तरी अपेक्षेप्रमाणे प्रवासी आणि उत्पन्न वाढत नसल्याचे लक्षात आले. त्यामुळे सेवा अधिक चांगली, विश्वासार्ह आणि प्रवाशांशी जोडणारी करण्यासाठी हा प्रयत्न केला जात आहे.

 

या मोहिमेनुसार चालक आणि वाहक यांची भूमिका अधिक जबाबदार आणि सेवाभावी केली जाणार आहे. बस स्वच्छ ठेवणे, वेळेवर फलाटावर आणणे, नीट गणवेशात राहणे आणि प्रवाशांशी नम्रपणे वागणे यावर भर दिला जाईल. बस सुरू होण्यापूर्वी चालकाने स्वतःची ओळख करून देत प्रवासाचा मार्ग, थांबे आणि वेळ याची माहिती देण्याची पद्धत सुरू केली जाईल, ज्यामुळे प्रवाशांशी संवाद वाढेल.

 

प्रवाशांनाही या मोहिमेत सहभागी होण्याचे आवाहन करण्यात आले आहे. बसमध्ये स्वच्छता राखणे, स्वतःच्या सामानाची काळजी घेणे आणि नियम पाळणे यामुळे प्रवास अधिक सोयीचा होईल. तसेच स्मार्ट कार्ड आणि ऑनलाइन बुकिंगचा वापर वाढवण्यावरही भर दिला जाणार आहे.

 

जर बस रद्द झाली किंवा प्रवासात अडचण आली, तर प्रवाशांना लगेच पर्यायी व्यवस्था उपलब्ध करून देण्याचे निर्देश दिले आहेत. बसस्थानके स्वच्छ आणि सुरक्षित ठेवण्याची जबाबदारीही अधिकाऱ्यांवर सोपवली आहे. तक्रारींचेही तातडीने निराकरण करण्यासाठी स्वतंत्र व्यवस्था तयार केली जाणार आहे, जेणेकरून प्रवाशांना चांगला अनुभव मिळेल. ही मोहीम केवळ सेवा सुधारण्यासाठी नाही, तर एसटी आणि प्रवासी यांच्यात विश्वासाचे नवे नाते निर्माण करण्यासाठी महत्त्वाची ठरणार आहे.